Maunongon Ang Gugma

Gula 10

Wala motingog si Danica. Mora hinuon siya og nahugno. Dili pa diay siya makapauli dayon. Sa sinultihan sa lalaki iyang nasabtan nga ikuyog pa siya niini hangtod sa dapit nga gituohan niining dili na kini masundan sa kapolisan nga nagpangita niini.

Mibalik ang lalaki pag-angkas sa motorsiklo. Apan niining higayona, wala na molingkod ang lalaki sa iyang luyo. Siya nay nag-angkas sa luyo niini.

“Panggunit og maayo nako,” giingnan si Danica ni Jeffrey human paandara niini ang makina sa motorsiklo. “Lisod ra ba ang agianan nga atong subayon.”

Dayon gipadagan ni Jeffrey ang motorsiklo. Dili unta manggunit si Danica sa lalaki apan nahadlok siyang mahulog sa motorsiklo. Maong napugos siya sa paggunit sa mga abaga sa lalaki bisan gibati niya nga dili siya komportable.

Kalit lang napawong ang makina sa motorsiklo. Gisusi dayon ni Jeffrey kun unsay hinungdan. Gibuksan niini ang tangke. Si Danica igo lang naniid sa gibuhat sa lalaki.

“Buysit,” ni Jeffrey pa. “Wala nay gasolina.”

Gipakanaog siya ni Jeffrey sa motorsiklo. Misunod usab pagkanaog si Jeffrey. Unya giganoy ni Jeffrey ang motorsiklo ug gitukmod ang motorsiklo ngadto sa bakilid. Nahulog kini sa kimba sa ubos. -- Sumpayan pa