Ang Linugdangan

Gula 7

Dali ra nga miasenso ang kahimtang ni Gelyn tungod sa pakigrelasyon niya kang Ronald. Alang kang Gelyn wala gayod siya magmahay nga nakig-relasyon kang Ronald kay daghan kaayo kini’g kuwarta. Napaayo ni Gelyn ang ilang balay nga gubaon na unta og naatiman na niya ang iyang kaugalingon.

Misamot ang kaanyag ni Gelyn ug mihamis pag-ayo ang iyang pamanit. Dili na maihap nga giangkon ni Ronald ang iyang pagkababaye. Nakat-on na usab og paghigugma si Gelyn ngadto kang Ronald.

“Nindot usab kaayo ang imong gipili nga angga no? Orchids,” dihay higayon nga si Ronald wala makapugong sa paghandum sa unang gabii nga sila nagkahimamat ug si Gelyn didto sa bar.

“Wala ka ba’y plano nga imo kong pakaslan?” gipangutana ni Gelyn si Ronald usa ka higayon sa ilang panagdeyt. “Unya na kana. Magtigom pa ta’g dugang kuwarta,” mubo nga tubag ni Ronald.

Daw gisubhan ang dakung tinguha ni Gelyn nga mahiusa na unta sila si Ronald. Nasabtan ni Gelyn nga tinud-anay usab ang gugma kaniya sa lalaki.

“Unsa man g’yuy imong negosyo?” subli na usab nga nangutana si Gelyn niini kay wala man gayod siya tug-ani ni Ronald kun nganong daghan siya’g kuwarta. “Mahibawo ka ra. Kuyog ta, duna koy transaksyon karon,” ni Ronald pa.

Nabantayan ni Gelyn nga pirmi nga si Ronald dunay ika-estorya sa iyang cellphone. Sa iyang paniid nagsabot sa kantidad.

“Sige Lyn, adto na ta kay alas sayes sa gabii ang atong transaksyon. Moganansya ta og two million niining maong transaksyon,” ni Ronald pa.

Mipaingon sila sa sakyanan ni Ronald. Paspas ang pagpadagan niini sa sakyanan. “Duol na ta sa barangay Kasambagan Lyn, kuhaa kanang box nga gitabonan nako og itom nga leather dapit sa imong tiilan.”

“Shabu ang sulod niana. Dunay mopalit niana,” matud ni Ronald nga mi-parking sa sakyanan sa grahe sa usa ka fastfood sa Kasambagan. Nakalitan si Gelyn sa iyang nadungog nga drug pusher diay si Ronald. May gikontak kini sa cellphone. Taud-taud may mga tawo nga nanggawas gikan sa laing sakyanan ug mipaingon sa ilang nahimutangan.

Giablihan ni Ronald ang bildo sa bentana. Mitunol ang usa ka tawo og binandol nga kuwarta ug gidawat ni Ronald. “Itunol Lyn ang box,” ni Ronald pa. Diha-diha sila si Ronald ug Gelyn gidakop sa maong mga tawo nga sakop diay sa intelligence unit.

Gibuwag sila’g prisohan ug pwerteng nakahilak ni Gelyn sa iyang gidangatan. (Kataposan)