Imo patay Mama

Wa ko kapugong nga nagsud-ong sa akong asawa nga naghigda ibabaw sa among kama sulod sa among kwarto. Mi-amag man gud ang kaputi sa iyang lawas sa sihag niyang daster nga gisul-ob. Bisan kagabii pa kong naka-iskor, apan nangisog pa gyud ang akong junior nga naglantaw sa hubon sa akong asawa nga mihulma.

“Pa-iskora na sad ko, Gang bi” hunghong ko ni Irene nga naghigda tupad sa among tres anyos nga anak babaye, nga si Zakira Zenn, nga nagduwaduwa sa monikang gigunitan.

“Ha! Nabuang ka! Kita kang naa ang atong anak, nya mo-iskor ka!” sa akong asawa nga hunghong pinabanghag.

“Sagdi lang gud, Gang, Total, di paman intawon na kasabot sa atong gibuhat,” dugang kong pangalyupo sa akong asawa aron madala gyud siya sa akong hangyo nga sagol kahigwaos.

“Hay di ... unsa guy di kasabot ... nga haska mang brayta ning imong anak! Liwat man ni nimo, baga’g kabuang!” ni Irene dayong takilid ug didto miatubang sa among anak nga nagduwaduwa sa monika. Apan wa gyud ko nahimutang. Nag-alindasay gyud ang akong lawas tungod sa pagpanggahi pa sa akong junior nga nagpangita pa og away. Mi-igham ko sa dihang nakakita ko’g paagi aron mogawas si Zakira sa among kwarto. Mikuha ko’g tibuok singko aron ihatag ko sa akong anak. Gituyo ko nga singko ang akong ihatag aron dugay kini mahurot.

“Day ... Kira....! Day, diay singko day o ... palit didto og kindi sa tindahan nilang Nang Lucy. Ug unya na balik ha ... kun mahurot na ang imong mga kindi og kaon” Nagpahiyom ko nga mitunol sa singkong tibuok nga abtik usab nga gidawat sa sipaton kong anak. Paggawas sa among anak sa kwarto, dali kong gihamagan ang akong asawa nga daw nahimuot sa akong gibuhat.

“Garabi ka, Gang! Nangita ka lang gyug paagi para maka-iskor” ni Irene nga misugot nalang sab sa akong gipangayupo. Dali kong gihuboan ang akong asawa sa tanan niyang mga sapot ug dali ko usab nga gihubo ang akong mga sapot. Daginuton ang matag gutlo kay basin unya’g maabtan me sa sipat namong anak. Milit-ad ang hubong lawas sa akong asawa sa dihang gipatungan ko na kini. Apan sa kadugayan ko’g hinandos, kalit nga mipaka ang akong lubot nga gibunalan sa gahi’ng butang. Ug sa paglingi ko, maoy akong nakita ang akong anak nga mihunat na usab sa gigunitang silhig lanot aron ilapdos na usab sa akong lubot.

“O..o..o ohhh .... Da ... da ... dahhh ... ha...! imo patay mama....! ha...! imo patay mama...!” sa akong anak nga suko kaayo og nawong ug kahilakon samtang naglapdos sa silhig sa akong lubot.

“Wa-wawawaaaa day uy ... wa man nako patya si mama mo, day ... nag-love-love raman mi” matud ko nga nagpanghikap sa akong lubot nga milabhag nga naigo sa bunal.

“Ha...! imo patay mama...! Dat-og ka mama ... pislat na...! patay na....!’ sa sipat kong anak nga mihunat na usab og bunal sa gigunitan niyang silhig. Ug dali ko nalang mikawas sa hubong lawas sa akong asawa aron dili na mabunalan pag-usab. Ug gikuha ko ang tuwalya nga anaa ra sa akong duol aron itapis sa hubo kong lawas.

“Da...! mauna, Gang...! giuna man lang ang kahigal.... wa man sirad-i ang pultahan. Dahhh..! mao nay pago nimo nga sobra ka butakal” hunghong nga pinabanghag na usab sa akong asawa nga daling mibukot sa habol.

Ug giduol ko ang among anak aron pangutan-on kun nganong dali ra kining nabalik.

“Wa ko palit kindi, Pa. Tagak ako kwarta sa kanal,” ni Zakira Zenn nga naulian na sa iyang kasuko ug mikuha sa iyang monika pagbalik ug mitupad og paghigda kanamo. (Katapusan)