Maunongon Ang Gugma

Gula 9

“Ako si Danica,” mikurog ang iyang mga ngabil nga mitubag. “Danica Lucenos.”

“Usbon ko ang pagpangayo og pasaylo sa akong nabuhat nimo, Danica,” matud ni Jeffrey. Nahimo ko lang kadto tungod kay gikinahanglan ug gipangayo sa higayon. Wala na koy choice. Wala na koy laing nahunahunaang laing paagi aron makaikyas sa mga tinugyanan sa balaod gawas sa pag-hostage kanimo. Ang maong hitabo isipon kong dakong utang kabubut-on kanimo.”

Wala motingog si Danica. Apan ang kalagot nagpanglugnot sa iyang kahiladman. Baga gyud og nawong kining tawhana, niya pa sa hilom. Human sa gihimo niini kaniya, daw buot pa siyang patuohon niini nga buotan kini ug maantigong motan-aw og utang kabubut-on. Alang kang Danica, usa ka pagbugalbugal ang gihimo sa lalaki kaniya.

“Ayaw kahadlok,” ni Jeffrey pa. “Wala koy daotang tuyo nimo.”

“K-kun tinuod nga wala kay daotang tuyo nako,” nakabaton na’g diyotay’ng kaisog si Danica sa pagpakigsulti sa lalaki,” tugoti ko nga makapauli.”

“Ayaw kabalaka,” sa lalaki pa. “Papaulion ko ikaw. Seguroon ko lang una nga dili na ako masundan sa kapolisan sa dili ko pa ikaw papaulion.” -- Sumpayan pa