First time

Dear Tita Salie,

Maayong adlaw kanimo, Tita. Hinaut nga maayo ang imong panglawas karon. Kanunay gyod ko nga magbasahan og Banat News labina sa imong column, paborito gyod ni namo sa among trabahoan. Magpasalipod lang mi aron dili makit-an nga nagbasabasa lang.

Tawga lang ko og Mr. O, 22 anyos, usa ka ulitawo. Nagtrabaho ko isip usa ka warehouseman sa usa ka mall dinhi sa atong dakbayan.

Ang akong problema, Tita, kabahin sa babaye nga akong ka-textmate. Textmate lamang nako siya sa una hangtod nga nagkasabot mi nga magkita. Dihang nagkita mi, Tita, nanulod mi og usa ka motel. Siyempre kami rang duha didto ug duna gyoy nahitabo tali kanamo. Siya gyod ang naka-virgin nako, Tita, kay first time man nako to nga nakasuway’g gamit og babaye. Ug sukad niadto magsige naman ko og hunahuna niya. Mora og dili na gyod nako siya makalimtan. Mora og na-inlove na man hinuon ko niya, Tita.

Ang problema nako karon kay dili na man hinuon nako siya makontak. Murag nag-ilis man siya og numero. Na-inlove kaha ko niya, Tita, o tungod lang kini sa kalami dihang nag-himo” mi? Palihog pasabta ko. Daghang salamat and God bless. -- Mr. O.

* * *

Dear Mr. O. Nagpasalamat ko sa inyong pagsunod ug pagsige og basa sa atong “Banat News,” ug sa akong column. Manghinaut lang ko nga sa matag basa ninyo sa akong mga tambag aduna kamoy makat-onan ug inyong mapuy-an sa inyong kinabuhi.

Lisod na gyod tugkaron ang panghunahuna sa atong mga batan-on karon. Dili sama sa unang panahon nga mora og nasayod na kita sa sunod nga panghitabo sa kinabuhi sa tawo. Sama pananglitan kun ang usa ka lalaki nanguyab sa usa ka babaye ato na nga ma-anticipate ang ilang kaminyoon. Ilabi na kun sila nag-holding hands o kaha nahagkan na niya ang babaye, mora og sigurado na kita nga sila gyod ang magkadayon. Kini tungod kay sa una anaa pa ang mga maayong values sa kada tawo. Anaa pa ang “purity of intention” sa tawo. Apan karon lisod na natong ilhon kun tininuod ba ang tinguha sa tawo. Bisan pa man gani ang pagpalimos sa tawo o kaha pangaroling ato nang kadudahan.

Ayaw na lang paghandom sa imong textmate kay tingali kun naglingaw-lingaw lamang siya. Kun bag-o pa lamang kamo tingali dili pa kana gugma ang imong na-feel. Basin kun na-amazed ka lang sa nahitabo kaninyong duha. -- Tita Salie