Maunongon Ang Gugma

Gula 8

Nagpabilin siyang nag-angkas sa motorsiklo. Wala siya motingog.

“Dili nako tuyo ang pagdagit nimo,” mipasabot ang lalaki. “Pero wala na koy laing recourse niadtong higayona aron makalikay sa mga tinugyanan sa balaod gawas sa paghimo kanimong instrumento.”

Wala gihapon motingog si Danica. Buot niyang ipakita ngadto sa lalaki nga naglagot ug nasuko siya sa gibuhat niini kaniya. Apan ang iyang kalagot ug kasuko gibuntog sa kahadlok nga iyang gibati ngadto sa maong lalaki.

“Ayaw kahadlok nako, Day,” nagkanayon ang lalaki. “Dili ko daotang tawo. Ipasalig ko nga wala’y daotang mahitabo nimo sa akong mga kamot.”

Mikunot ang iyang agtang nga mitutok sa lalaki. Unya gibawi niya’g dali ang iyang panan-aw dihang hapit sila magkatinutokay.

Dili daotang tawo? Unsaon niya pagtuo sa maong pamahayag sa lalaki. Kun dili pa kini daotang tawo, nganong gipangita ug gigukod man kini sa mga tinugyanan sa balaod?

Sa iyang nasayran, ang gukdon sa kapolisan mao kadtong mga tawong daotan. Unya patuohon siya niining lalaki nga mi-hostage kaniya nga dili kini daotan? Nakapanglimuk si Danica.

“Ako si Jeffrey,” mipaila ang lalaki kaniya. “Jeffrey Acero. Ikaw, kinsa ka man?” -- Sumpayan pa