Naghikog

Dear Tita Salie,

A pleasant day to you, Tita. Tawga lang ko sa pangalan nga Lyn2x, 17 years of age.

Ang akong problema dili kini ako,apan gusto lang ko nga makatabang sa laing tawo. Ug aron imong masabtan, Tita, ingon niini ang sitwasyon.

Anaa koy igsoong babaye ug duna siya’y duha ka uyab. Apan ang iyang mga uyab wala gyod masayod nga duha sila kabuok nga gilumpong sa akong ate. nakigminyo ang akong ate ngadto sa usa ka lalaki kay tingali mao kadto ang mas niyang gihigugma.

Sa dihang nahibaw-an sa usa ka uyab nga nagminyo na sa lain ang akong ate naghikog kini. Dili niya madawat ang gibuhat sa akong ate kaniya ug dili siya makatugot nga mapunta sa lain ang akong ate. Maayo na lang gani kay natabang ra siya ug wala ra mamatay.

Maluoy gyod ko karon sa maong lalaki, Tita. Kanunay nalang siyang magul-anon karon. Nahadlok ko nga iyang usbon pagbuhat ang iyang gibuhat sa una. Unsa may akong buhaton, Tita, aron duna sad koy ikatabang kaniya? Palihog pasabta ko. Magpaabot gyod ko sa imong tambag. Thank you very much. -- Lyn2x

* * *

Dear Lyn2x. Dali kaayo ko ma-impressed sa mga tawo nga sama kanimo dako og kasing-kasing alang sa panginahanglan sa uban. Kanunay man gud natong maobserbahan karon nga ang mga tawo nag-iyahay na lang og padagan sa ilang kinabuhi ug wala nay pakialamay o hilabtanay sa uban. Maglisod na usab kita pagsuta sa tawo kun ang iyang tumong sa tabang nga iyang gihimo limpyo ba kini ug walay laing intention.

Paningkamoti nga masuod nimo siya. Duola siya panagsa aron imo siyang ikahinabi. Ang ingon niana nga sitwasyon nagkinahanglan siya og dunay ikasultisulti. Kun miyembro ka sa usa ka organization sa inyong dapit agniha siya nga moapil. Kon duna kay giapilan nga mga activity ikuyog siya aron usab aduna siyay bag-ong kalingawan ug sa hinay-hinay iyang makalimtan ang kaguol nga anaa karon sa iyang dughan.

Imo siyang tudloan nga makamao modawat sa bisan unsay moabot sa atong kinabuhi, makalipay man kini o atong ikaguol. Kay adunay mga butang nga dili kita ang magbuot, busa ato kining dawaton kun kini gimbut-an sa kapalaran.

Duol usab kamo sa simbahan kay adunay daghang mga activities sama sa pagkanta sa misa nga makalingaw usab kaniya. Sa ingon niining paagiha imo usab siyang magiyahan sa hustong dalan. -- Tita Salie