Gikapoyan sa batasan

Dear Tita Salie,

Have a nice day, Tita. I hope everything is fine with you. Just call me Lyra, 24 years of age from Cebu City and still single ug morag hapit na mahimong available.

Naa koy boyfriend karon ug six years na ang among relasyon. Apan unsaon man ni nako nga mura naman hinuon ko og kaundangon tungod sa iyang kinaiya nga maglisod na ko og sabot. Nanubra gyod ang iyang pagkaseloso.

Bisan kun dugay lang ko nga maka-reply sa iyang text moingon gilayon nga duna koy lain ug akong ka-date maong wala ka-reply dayon. Usahay ngil-ad pa kaayo og ipanulti mura og wala nay respeto sa akong pagkatawo. Sakit kaayo ang ipanulti mahitungod kanako. Hasta pa akong mga higala iya pang apilon sa iyang kasuko. Bisan nasayod nako sa akong mga limitasyon sa akong mga higala magsige lang gihapon og yawyaw ug sakit kaayo ang iyang ipangsulti.

Gikapoyan na gyod ko sa iyang batasan nga siging advance ang hunahuna. Lahi ang iyang hunahunaon nako kanunay ug mga bastos pa ang uban. Wala gyod siyay respeto nga iya man unta kong uyab. Unsa may akong buhaton? Palihog pasabta ko. Daghang salamat and more power. -- Lyra

* * *

Dear Lyra. Common kaayo sa mga relasyon ang problema sa pagkaseloso o selosa. Wa ko kahibalo kun duna bay tawo nga dili kamao magselos. Sa akong tan-aw tanang tawo anaa niini. Tungod kay usa kini ka kinaiya nga iyang gidawat gikan sa iyang inahan sa dihang diha pa siya sa tiyan. Ang uban niini naalagaan pinaagi sa mga panghitabo sa ilang kinabuhi dihang ang bata nagtubo. Mao nga ang pagkaseloso o selosa sumala sa akong makita dili pareho. Dunay seloso gamay, dunay seloso gyod ug dunay sobra kaayo kaseloso. Nahimo kining mora og sakit sa tawo.

Alam-alami ang imong boyfriend. Ingna siya nga gamay ra kaayo ang iyang tan-aw sa imong pagkatawo. Pahibaw-a siya nga sa iyang batasan ikaw ang mas naapektohan kay wala na siya’y respeto kanimo.

Human nimo og pasabot kaniya imo siyang warningan nga kun magsige pa siya og dagmal kanimo sa emotional nga paagi imo na siyang bulagan. Ug imo gyod kanang buhaton aron ang maong lalaki makat-on sa iyang sayop ug maningkamot siya nga iyang mausab ang iyang kinaiya. Mas sakit ang dagmal pinaagi sa sulti. (verbal-emotional) kun atong ikompara sa dagmal nga physical. -- Tita Salie