Magpahilayo na lang ako

Manganak ka pa ba, Ed?” Nangutana si Val kang Edna samtang nag-merinda sila sa gamay’ng tindahan sa aseras.

“Di na tingali Val, oy, kay 52 na god ko. Ngano man diay?”

“Wala. Ang ako lang unta, nga just in case nga magkadayon ta, gusto kong magkaanak pa ko nimo.”

“Unsaon nato pagkadayon, Val, nga may asawa pa man sab ko bisan nagbulag na kami. Di man ta mahimong magpakasal.”

Ingon niana ang kahimtang sa duha. Bulag sa bana si Edna apan walay anak samtang si Val 68 na apan himsog pa gihapon ang panglawas niini. Ang iyang asawa, manghud niya og pito ka tuig apan masakiton kini sulod na sa unom ka tuig ug luya na kini. Pito ang ilang mga anak, apan may mga pamilya na kini busa si Val ug ang masakiton niining asawa mao nalang ang anaa sa balay.

Apan pila na ka bulan nga wa na sila magkita si Edna. Mahal ni Val si Edna apan iyang giantos ang kamingaw kay nahiubos siya.

“Uy, Val! Dugay ka na man nga wa magpakita sa barkada,” timbaya ni Alex sa dihang nagkita sila sa Colon.

“Nagpalayo nalang ko Lex.”

“Ngano man?”

“Medyo may kahiubos ko. Natandog ang akong pagkatawo.”

“Kang kinsa man?”

“Wala. Iluom ko nalang ni, Lex.”

“O, sige, pero bisan unsang orasa ka mobalik sa barkada, welcome kaayo ka. Duawa sab didto si Edna.”

Apan wa na gyud mopakita si Val didto. Nahiubos siya kang Edna kay sakit kaayo kining manulti. Dihay kausa, nga may kamera ang usa nila ka barkada, mihangyo si Val nga magpa-retrato sila si Edna apan giingnan hinuon siya, “Di ko oy! Ipabarang pa nuon ko ana.”

Ug sukad niadto, di na man lang kini mangumosta kaniya bisan sa tex nalang. Busa nakaingon si Val nga siya lang ang nagmahal apan wala kini magmahal kaniya.

“Magpahilayo nalang ako,” matud ni Val sa kaugalingon. (Katapusan)