Pista ni San Roque

Pagkakilomkilom, gipagula sa kapilya ang karo ni Senyor San Roque aron sugdan ang iyang prosesyon libot sa mga sityo sa barangay San Roque, Talisay.

Milugmaw ang luha ni Titing sa kalipay nga nagtan-aw sa kadaghan sa mga bata, bayongbayong, hamtong ug mga tigulang nga nanguyog sa prosesyon.

Pagbalik sa karo ni Senyor San Roque sulod sa kapilya misugod dayon ang butobuto sa rebintador. Gisundan sa kastilyo nga nakapahugyaw sa mga tawo tungod sa kaanindot sa nagsiritsirit nga siga nga gisawilik sa nagtuyok nga mora og ligid sa bisiklita.

Misamot pagpanghugyaw ug namakpak ang mga tawo sa dihang naglumba pagsulbong ang mga kuwitis ug ‘bombshells’ padulong sa kapanganuran aron pintalan ang langit og nagkadaiyang kolor sa kahayag nga manuagsik inigbuto sa ‘bombshell’ ug kuwitis.

Wala nay tawo nga mas malipayon pa ni Titing niadtong higayona. Wala siya makatoo nga maingon niadto kasadya ang pagsaulog sa kapistahan sa ilang Patron Senyor San Roque bisan sa kanihit sa kuwarta nga pundo sa ilang kapunongan. Sa tumang kalipay wala na siya makahibalo nga nagluhod na diay siya sa sulod sa kapilya aron pagpasalamat sa Ginoo.

Sa luhaang mata mikibot ang iyang baba sa mga pulong nga maguwang la’g diyutay sa hagawhaw: “Lord, salamat nga aduna pay mga tawo nga misalig kanako, wala magpanuko paghatud sa akong panimalay, sa ilang amot alang sa galastuhan sa kapilya. Pasayloa ako sa akong kahuyang, nga usahay magmahay nga imong gipasagdan nga mahiduol sa mga tawo nga dautan ug hunahuna nga ang akong pag- alagad sa kapilya gihimo kong puhonan sa politika ug ang amot sa katawhan akong gibulsa. Lord, Ikaw lang ang labing nasayud niining tanan ilabi na sa akong kinailadman. Nasayud ka nga dugay na unta akong moundang sa akong mga kaakuhan sa among kapunongan, ilabi na ang pagpangubra og amotan sa katawhan. Salamat na lang nga aduna koy bana nga kanunay nakong mopahimangno nga likayan ang away ug unahon ang pag-alagad sa simbahan kay sa pagpakabana sa mga tawo nga itom og dila, may tinagoang motibo pagbungkag sa panaghiusa sa kapunongan....”

Naputol ang pag-ampo ni Titing sa sangpit sa iyang anak nga ganiha ra diay’ng nangita.

“Ma, pauli na sa ato kay gapaabot na nimo ang mga tindera sa kandila nga imong mga bisita.”

Mipauli si Titing nga puno ang hunahuna sa kahimatngon, nga walay dili mahimo sa pailob ug pagpaubos kun kini gamiton sa gitinguha nga kab-uton.

“Malipayong pista Senyor San Roque,” kinasingkasing nga pag-abiabi ni Titing sa iyang mga bisita. (Kataposan)