Maunongon Ang Gugma

Gula 5

Pero wala mokihol ang lalaki. Mao nga giwalis sa polis ang kalo nga gisul-ob niini. Ug mora’g nakugang ang polis nga daw nakaila sa lalaki.

Apan abtik ang lalaki. Kalit kining mipatugpa sa makusog niining kinumo ngadto sa apapangig sa polis. Ang polis nga daw nawad-an sa panimbang nahasan-ok sa lingkoranan.

Dihadiha abtik ang lalaki nga milanit sa armas gikan sa hawakan niini ug gigunitan si Danica. Ang tumoy sa pistola nga gigunitan niini gidul-it sa iyang ulo.

Kalit lang gisanapan sa tumang kalisang si Danica. Kinsa ba diay kining maong lalaki? Ngano bang armado man kini ug ingon sa maoy tuyo sa kapolisan?

“Ayaw kamo pagpakita’g daotang lihok kun dili kamo buot nga mapusgay ang ulo niining babaye,” nagkanayon ang lalaki nga mi-hostage kang Danica.

Si Danica wala makatingog. Mikurog siya sa kahadlok. Wala siya magdahom niining hitaboa. Nakita niya ang tulo ka polis nga nagtion og armas sa lalaki.

“Dili ko magpanuko sa pagpatay niining babayhana kun mamugos gayod kamo,” giingnan sa lalaki ang mga polis. “Buhii kanang inyong mga armas.”

Wala mokihol ang tulo ka polis.

Gidul-it sa lalaki sa iyang tampihak ang sumbohan sa armas niini.

“Uno...”

Miihap ang lalaki. -- Sumpayan pa