Gula 59
“Materialistic ka ra tingali kaayo, Ate.”
“Tingali. Pero sa panahon karon, kinahanglan nga praktikal na kita. Dili maayo kun ang mando ra sa kasingkasing maoy sundon kanunay. Kinahanglan nga gamiton usab ang utok.”
Wala na motingog si Colleen. Dili siya buot nga tingali’g mosangko pa unya sa panaglalis ang pagbayloay og mga katarongan nila ni Alexa. Gitahod niya ang desisyon sa iyang maguwang. Anaa na kini sa hustong edad ug kabuot sa pag-decide kun unsay maayo alang sa kinabuhi ug kaugmaon niini.
Apan mibati gayod si Colleen og kaluoy ngadto kang Cody tungod sa gibuhat ni Alexa ngadto niini. Mibati siya’g dakong kahinugon sa nabugto nga relasyon sa duha.
Hangtod sa paghigda ni Colleen sulod sa iyang lawak nianang pagka-gabii human sa panihapon, ang gipanagsultihan nila ni Alexa mi-replay sa iyang kaisipan. Alang kaniya, nagluib si Alexa sa relasyon nila ni Cody. Wala tumana sa iyang maguwang ang gikasabotan nila ni Cody.
Wala magdahom si Colleen nga makahimo ang iyang Ate Alexa sa pagbugto sa relasyon nila ni Cody sa dakong kasayon. Nasayod siya nga in love kaayo ang iyang maguwang ngadto kang Cody. Gani, napulos lang pagdayeg kang Cody ang baba ni Alexa kaniadto. Magselos gani siya sa higayon nga suginlan siya ni Alexa sa nahitabo sa panag-date nila ni Cody kaniadto. -- Sumpayan pa