Ang linugdangan

Human sa pagkataktak ni Mr. Beltran sa iyang pagka manager ug si Gelyn sa pagka personnel section chief sa kompaniya nga ilang gitrabahoan, wala na g’yud sila magkita. Bisan sa cellphone wala na sila magkakontak kay mora’g giilisan ni Mr. Beltran ang iyang numero.

Lisud kaayo ang kahimtang ni Gelyn tungod kay wala na siya makapangita og laing trabaho kay daku na man ang iyang tiyan sa bunga sa kinawat-kawat nila nga kalipay ug ni Mr. Beltran. Miabut ang higayon nga gipahimugso ni Gelyn ang ilang anak ni Mr. Beltran.

Misamot ang kalisud sa ilang pamilya. Pagmahay ra maoy nahimo ni Gelyn samtang naghandum sa iyang sayop tungod sa pag-uyon niya makigdeyt ni Mr. Beltran bugti nga madawat siya sa giaplayan nga trabaho.

Diha’y higayon nga mihilak pag-ayo ang iyang anak ug nasabtan ni Gelyn nga gigutom na kini pag-ayo kay kuwang na ang iyang gatas nga masupsop tungod sa kakuwang usab niya og maayong pagkaon.

“Uy nganong mihilak man na pag-ayo Day?” usa ka silingan ni Gelyn wala makaagwanta og miduol kini kay nabantayan nga naglisud na g’yud si Gelyn sa pagpahilom. Mitulo ang luha ni Gelyn nga mitug-an nga wala na siya’y gatas nga masupsop sa bata ug wala usab siya’y ikapalit og gatas.

“Kalooy baya nimo uy. Sige huwata ko kay magkuha ko’g kwarta aron makapalit ka’g gatas para sa imong anak,” matud sa silingan ni Gelyn nga si Lucy. Wala magdugay, mibalik si Lucy ug mitunol og usa ka gatus ka pesos ngadto ni Gelyn. “Sige na, ayaw kauwaw, dawata na kining kwarta para makapalit ka’g gatas sa imong anak,” ni Lucy pa. Kadto ang sinugdanan sa ilang panagsuod ni Lucy. Pagka gabii, nakita ni Gelyn nga seksi kaayo si Lucy. “Trabaho ka na day? Basin matabangan ko nimo nga makasulod og trabaho sa imong gitrabahoan para maiban-ibanan kining among kalisud,” giingnan ni Gelyn si Lucy. “Mosulod ka sa akong trabaho?”

Ingon sa dili makatoo si Lucy nga si Gelyn nga nakahuman og business management mosulod sa iyang trabaho pagka dancer sa bar.

“Wala ko magkomedya Day…bisan unsa nga trabaho akong sudlan para mabuhi nako ang akong anak ug makatabang ko nila ni Mama ug Papa,” seryoso kaayo ang dagway ni Gelyn.

“Sige akong sultihan ang manager sa bar nga gusto ka nga motrabaho. Dawat ka g’yud kay gwapa ka gud. Kusogan ka pa unya sa hot cake,” giingnan ni Lucy si Gelyn. (Sumpayan)