Matulog dayon

Dear Tita Salie,

Hello, Tita ug kumosta? Tawga lang ko sa pangalan nga Ms. Libra, 31 anyos na ko ug bag-ong minyo.

Buotan kaayo ang akong bana ug hilomon nga tawo. Bisan kun hilomon siya apan dili suplado. Manggiuwawon apan kun imong unahan og estorya motubay gayod siya. Maong nakigminyo ko niya kay na-inlove ko ug ganahan ko sa mga hiyas nga anaa kaniya. Ug mora usab og dili kamao masuko.

Human sa among kasal excited na kaayo ko sa among unang gabii. Kay amo man gayod nga gihuwat nga makasal kami ug wala gayod namo himoa ang giingon nilang sex sa dihang uyab pa kami. Apan nianang pagkagabii human sa among kasal wala may nahitabo kanamo kay natulog ra man siya dayon. Ako lamang kadtong gisabot nga kapoy siya kaayo kay daghan man kami og gitrabaho before sa among kasal.

Apan hangtod karon duha na ka bulan ang nilabay wala gayod kami sexlife. Wala pa gayod ko niya hilabti. Modiretso na lang siya’g tulog inigkagabii. Mauwaw man pud ko mag-una una kaniya. Unsa may angay kong buhaton? Palihog pasabta ko. Daghang salamat. -- Ms. Libra

* * *

Hi, Ms. Libra ug komusta? Lisod gayod ang kinabuhi sa usa ka Ma. Clara. Bisan kun gusto nato apan dili man puyde nga kita ang manguna sa lalaki. Mao kini ang atong naandan nga kinaiya nga sukad pa sa una sa atong mga katigulangan ug maoy gusto nila nga ipasunod kanato hangtod karon. Apan segon sa atong nakita ang atong mga batan-on karon mora’g lahi na ang ilang gusto. Mora og wala na nila gisunod ang hiyas sa usa ka Filipina.

Nakasabot ko sa imong punto, Ms. Libra, nga tungod kay gisudlan kanang kinabuhia, ang kinabuhing minyo kinahanglan gayod nga dunay lovemaking nga mahitabo. Apan wala magpakabana ang imong bana mahitungod niini.

Magtiayon na kamo, so dili na daotan kun imo siyang paraygan. Imo siyang hatagan og motibo nga gusto na nimo nga inyong buhaton ang bulohaton sa mga magtiayon. -- Tita Salie