Kapit-patalim

Gula 7

Gipahibalo ang tanang kawani nga dunay emergency meeting uban sa presidente sa kompaniya.

“Hala, unsa kaha’y ipahibalo ni Ma’am no? Tingali ipahibalo na niya ang pagpatuman sa increase nga gimando sa Regional Tripartite Wages and Productivity Board,” matud sa usa ka kawani.

Dali ra nga nagkatigom ang mga kawani didto sa conference room. Nagpaabot sila sa pagsulod sa presidente sa kompaniya. “Tagsa ra diay na nga makigmiting ang presidente sa kompaniya Day? Gipangutana ni Gelyn ang iyang kauban sa trabaho.

“Usahay kausa ra sa usa ka tuig, ug usahay gani wala g’yuy bisan usa. Kana ra g’yud nga dunay mahinungdanon kaayo nga isyu nga moanhi siya,” matud sa kaubang kawani ni Gelyn.

Taud-taud kalit lang mihilom ang tibuok conference room kay mibukas na ang pultahan dapit sa atubangan nga direkta nga molusot sa opisina sa manager. Misulod sa conference room ang presidente sa kompaniya nga si Monina Rodriguez. Giliraw ni Gelyn ang iyang mga mata, gipangita niya si Mr. Beltran.

“Good afternoon. Akong ipahibalo kaninyo karong hapona nga sugod ugma, bag-o na ang inyong manager. Nahukman sa mga sakop sa Board of Directors nga taktakon sa katungdanan si Mr. Beltran tungod sa dako niyang sala nga nahimo nga nakiglambigit ug nakigrelasyon sa kauban ninyo nga kawani.”

Ang maong pamahayag sa presidente sa kompaniya daw liti sa udtong tutok nga miigo kang Gelyn. Mao diay nga wala niya makita si Mr. Beltran nga mitambong sa miting kay gitaktak na diay kini sa trabaho.

Giawhag sa presidente ang mga kawani nga suportahan ang bag-ong manager ug nga gipahibalo niini ang pagpatuman na sa usbaw sa sweldo basi sa gimando sa RTWPB.

Miduol sa nahimutangan ni Gelyn ang secretary ni Mr. Beltran. “Makig-estorya nimo ang bag-ong manager Gelyn adto sa opisina human sa atong miting.” Gikulbaan ang dalaga kun unsay tuyo kaniya sa bag-ong manager.

“Sir?” ni Gelyn pa nga misulod sa opisina ni Mr. Beltran nga karon lain na ang naglingkod. “I’m sorry to tell you Miss Bonsubre, kutob ka na lang karong adlawa sa imong trabaho niining kompaniya.”

“Giandam nang daan ang imong sweldo hangtod karong adlawa ug mahimo mo na kining makobra adto sa cashier,” matud sa bag-ong manager.

“Kapit-patalim ang akong gihimo Ma. Para lang g’yud madawat sa trabaho aron makatabang kaninyo, misugot ko nga makigrelasyon sa manager,” naghilak si Gelyn nga misaysay sa iyang inahan. (Kataposan)