Maunongon Ang Gugma

Gula 1

Apurado ang hunahuna ni Danica. Gusto niyang molarga na ang bus nga iyang gisakyan. Nagpanikad siya sa kabalaka. Nakaseguro siya nga niining mga orasa, hayan nadiskubrehan na sa iyang mga ginikanan ang paglayas niya gikan sa ilang pinuy-anan.

“Usa na lang!” Matud sa konduktor nga nagpanawag og pasahero. “Usa na lang ug molarga na!”

Ang gipasabot sa konduktor mao ang bakanteng lingkoranan nga tupad sa giokupahan ni Danica.

Dihay lalaki nga misaka sa bus. Nagkalibhay kini’g travelling bag, nagsul-ob og diyaket nga itom ug nagkalo og kinawboy. Maoy girumbo niini ang bakanteng lingkoranan sa tupad ni Danica.

Misibog si Danica aron paghatag og lugar sa lalaki. Misimpig siya sa may bentana. Igo lang nakapahimutang ang lalaki paglingkod, misinggit ang konduktor ngadto sa drayber nga molarga na sila.

Inanay nga miaginod ang sakyanan. Nanguros si Danica. Inanay siyang ingon sa naibtan og tunok dihang milarga na gayod ang sakyanan.

Taudtaod nang nagdagan ang bus nga gisakyan ni Danica. Ang lalaki nga iyang gikatupad paglingkod wala gayod magtimik. May mga higayon nga mopasiplat siya ngadto niini. Apan molingiw kini kun makamatikod nga iya kining gitan-aw. -- Sumpayan pa