Gula 3
Nakig-inom si Gelyn kang Mr. Beltran. Nanginit ang kalawasan sa dalaga nga naka-inom sa duha ka syat sa brandy.
Nabantayan ni Gelyn nga nalipong siya tungod sa iyang nainom. “Ok ka lang ba Gelyn?” ni Mr. Beltran pa. “Nalipong ko’g gamay Sir,” wala magpanuko pagtug-an si Gelyn sa iyang gibati.
Mitindog si Mr. Beltran ug miduol sa dalaga. “Dali, manghigda ta sa kama kay nanginit na usab ang akong kalawasan sa akong nainom nga bino,” matud ni Mr. Beltran.
Samtang giagbayan ni Mr. Beltran si Gelyn, gipatikan siya’g hawok sa iyang aping. Ingon sa gigil-asan si Gelyn sanglit wala pa siya’y pagbati ni Mr. Beltran.
Hinay-hinay siya nga gipahigda sa kama ni Mr. Beltran. Gipalihok ni Gelyn ang iyang mga tiil aron matangtang ang gisul-ob niyang sandal. Miplastar siya paghigda ug daw gipangulbaan sa sunod nga hitabo.
Gibuhong ni Mr. Beltran ang iyang kaibog sa dalaga dihang miatubang kini kaniya didto sa opisina nga nagbitbit sa iyang application letter nga gisulod og plastic folder.
Nag-akub pag-ayo ang masig nila ka mga ngabil ug takulahaw lang nga gisanapan si Gelyn sa dili matukib nga pagbati nga nakatilaw sa hawok sa umaabot niyang manager.
Lihok na kaayo ang tuong kamot ni Mr. Beltran. Gihapohap niini ang kalawasan sa dalaga. Natibuok na g’yud ang huna-huna ni Gelyn nga itugyan na niya kang Mr. Beltran ang iyang kaugmaon.
Pulos sila nangahilom apan padayon ang ilang kumbati. “Sir, ayaw baya ko’g pasagdi ha?” ni Gelyn pa nga naghangos. “Sure, sure, Gelyn,” mitubag si Mr. Beltran nga nag-abot usab ang ginhawa.
Milungtad og tunga sa oras ang ilang grabeng kumbati. “May hinigugma ka ba karon Gelyn?” gipangutana ni Mr. Beltran ang dalaga human sa ilang makutas nga pagromansahay.
“Karon Sir wala na. Gibuwagan nako ang akong boyfriend kay wala siya’y panglantaw sa among kaugmaon. Gipalabi niya nga magpabiling standby, wala mangita’g trabaho ug nagsalig ra sa mga ginikanan,” ni Gelyn pa.
“Unsa to’y imong nahuman nga kurso?” nangutana si Mr. Beltran kang Gelyn. “Business management Sir,” dali nga tubag ni Gelyn.
Daw may gihuna-huna si Mr. Beltran. Mitutok kini sa kisame. “Buyno kay bag-o ka pa man, ibutang ko ikaw nga assistant head sa Human Resource and Development Office maayo kay duna ka’y background sa pagdumala og patigayon,” ni Mr. Beltran pa. (Sumpayan)