Ang sinugdanan anaa sa kataposan

Gula 53

“Nganong karon ka man lang mopakita nako?” Sukit ni Colleen dihang nagkaatubang na sila si Brendan sa may sopa sa sala.

“May importante kong gibuhat,” tubag sa lalaki. “Wa sab ko maka-text nimo kay naisnats ang akong cellphone.

Wala motingog si Colleen. Igo lang siyang mitutok kang Brendan.

“S-sorry sa nahitabo, ha, “lugos makagula ang tingog ni Brendan.

“Ako’y angay mangayo og sorry nimo,” matud ni Colleen. “Nasayod kong nahiubos ka nako.”

“Nakasabot ko sa imong bahin,” ni Brendan pa. “Akong natugkad nga wa diay ko’y katungod nga mahiubos nimo.”

“B-Brendan.

“Sukad karon, Colleen, di na ko mag-demand gikan nimo og bisan unsa. Di na sab ka makapaabot nga mahiubos pa ko nimo. Di ko gustong magkabikil ang atong kabubut-on. Gusto kong hapsay ang dagan sa atong relasyon.”

“M-maayo ra sab nga mianhi ka karon,” mipalain si Colleen.

“Ngano man diay?” Gitutokan siya ni Brendan.

“Gidapit si Ate Alexa sa pagtambong sa kasal sa iyang higala adto sa Daanbantayan. Mokuyog niya si Cody. Gusto ni Ate nga mokuyog sab tang duha.”

“Di kaha ta ma-out of place niana?”

“Di tingali, uy. Imbitado man si Ate. Giingnan sab siya sa nagdapit niya nga puyde siyang magdala og mga kauban.” -- Sumpayan pa