Duha ka Aninipot

Nagkalingaw og sud-ong si Rene sa usa ka aninipot nga nagtuyoktuyok paglupad sa iyang atubangan. Ang silaw niini nga nagkidlapkidlap, nakahatag og kahayag sa dulom nga kagabhion.

“Katahom sa aninipot! Anhi lang sa probinsiya makita sa pagkakaron kining aninipot! Sa siyudad, wala na gyoy aninipot nga makita panahon sa kagabhion...!” nagkibotkibot ang baba ni Rene nga mipahiluna og lingkod sa lantay’ng kawayan nga diha sa natad sa balay sa iyang magulang babaye.

Maoy iyang gi-estaran karon, ning iyang pagbakasyon sa ilang baryo sa Anunang sa amihanang lalawigan sa Sugbo.

Usa ka inilang magsusulat si Rene, sikat nga radio reporter ug sikat nga kolumnista sa siyudad. Mituyo siya’g bakasyon sa Anunang aron lang makahanggap og lab-as nga hangin sa dapit nga maoy una niyang namat-an og kahayag.

Sa edad nga 40, nagpabilin siyang ulitawo ug nag-inusarang nagpuyo sa bag-o niyang gitukod nga bungalong balay sa siyudad sa Barangay Busay.

Tsikboy siya sa siyudad ug lainlaing lang nga babaye nga iyang gikarelasyon. Apan wala pa gayod moabot sa iyang kasingkasing ang babaye nga angay na niyang higugmaon sa tinud-anay.

Nagpadayon nga naglupadlupad ang aninipot sa atubangan ni Rene. Mingaw na ang tibuok kalikopan sa baryo Anunang niadtong orasa bisan alas-7 pa sa gabii.

Basta sa probinsiya, sayo nga mangatulog ang mga tagbalay. Gani, ang magulang babaye ni Rene uban sa bana niini ug tulo ka mga anak, nangatulog na usab.

Gituyo ni Rene nga mohanggap og lab-as nga hangin sa natad ning gabhiona, aron makakapkap ang iyang kaisipan og usa ka nindot nga tema, alang sa serye nga iyang gipadagan pagsulat sa Banat News.

Nahasiga ang mga mata ni Rene. Mipreno ang aninipot sa iyang tupad. May nagpuot nga aso. Unya, kalit kining nahimong guwapang babaye nga hilabihang putia sa is-is nga panit.

“Hello, Rene...!”

“K-kinsa ka? Nakaila lagi ka nako...!”

“Ako si Flordelis..., ang katalirungan mong engkantada nga nagpuyo sa karaan ug dakong dakit daplin sa inyong banika...!”

“H-ha? Tinuod gayod diay nga hangtod karon duna pay mga engkanto?”

“Oo, Ren! Tipo tikang lalake, mao nga nagpakita ko nimo karon...!”

Nagkatinutokay sila si Rene ug Flordelis. Nabatobalani dayon siya sa katahom sa engkantada. Daw gilamat siya!

“Gusto kong himuon mo akong bida sa gipadagan mong serye, Ren! Kitang duha, ang atong gugma ug ang atong romansa ning gabhiona...!”

Sa usa ka pamilok, nahimong hubo na ang tibuok lawas ni Flordelis nga mahigugmaon kaayong migakos kang Rene nga naglingkod sa lantay diha sa natad.

Gipasagdan lang ni Rene ang engkantada nga mao gyoy nangunay sa paghubo sa iyang polo shirt, karsones ug brip. Dili siya makabalibad ning talagsaong romansa nga wa niya palandongang matagamtaman niya uban sa usa ka aninipot nga usa sab diay ka guwapang engkantada. (Kataposan)