Ang sinugdanan anaa sa kataposan

Gula 52

“Tuod diay,” ni Alexa pa. “Karong Domingo kuyog ta.”

“Asa man?” Mikunot ang agtang ni Colleen nga mitutok sa maguwang.

“Motambong ta sa kasal ni Loida. Sa Daanbantayan.”

“K-kinsang Loida?”

“Akong higala. Nakakita ka na kaniya pero nalimot ka lang tingali. Nakaanhi na siya sa ato sa nag-eskuyla pa ko.”

Wala motingog si Colleen. Tingali tuod nakakita na siya kang Loida. Daghan na man gud kaayo ang mga higala sa iyang maguwang nga gidala niini sa ilang gipuy-an.

“Kasal ni Loida karong Domingo,” namulong na usab si Alexa pagkilab sa pipila ka daklit. “Usa ko sa gipadad-an niya’g imbitasyon.”

“Ikaw ra man kahay giimbitar?” Sukit ni Colleen.

“Oo. Pero giingnan ko niya nga puyde kong magdala og mga kauban. Maong nakahunahuna ko nga ikuyog tikaw ug si Cody.”

Nahauknol si Colleen. Kauban diay nila si Cody! Mora’g nagduhaduha siyang mokuyog.

“Kun gusto ka,” matud ni Alexa, “ikuyog usab si Brendan aron mas game and jamming.”

Gisurpresa si Colleen ni Brendan nianang pagkaugma. Mibutho ang ulitawo sa ilang pinuy-anan nga nagdala og mga gasa. May dala kining lab-as nga mga buwak alang kaniya. Nagdala usab kini’g ice cream. -- Sumpayan pa