Naghilak nga Bituon

Mitindog si Jackie. Unya gitalikdan niya ang prodyuser aron mogawas na sa resthouse. Nahisagmuyo siya pag-ayo sa gisulti ni Cesar Palomo kaniya.

“Asa ka?” Matud sa producer nga midali pag-agpas kaniya ug gigunitan ang iyang bukton.

“Mopauli na ko,” ni Jackie. “Dili ko makadawat sa imong offer. “Mahal ra alang kanako ang gipangayo mong kondisyon.”

“Giinsulto ba ko nimo?”

“Dili nako tuyo ang pagpanginsulto nimo. Pero ikaw ang nagtudlo nako nga mawad-an og respeto nimo.”

Sa kalit lang, gigakos si Jackie ni Mr. Palomo. Milugnot-lugnot siya. Apan kusgan kaayo ang mga bukton ni Mr. Palomo nga migakos kaniya samtang gikaligoan niini’g halok ang iyang dughan ug liog.

“T-tabaaannnggg...!” Nakasinggit si Jackie.

Kaha mibati’g kalagot sa iyang pagsinggit, gisandok ni Mr. Palomo sa kinumo niini ang iyang kuto-kuto. Mitikuskos si Jackie sa kasakit. Ug nalup-og siya sa salog nga wala nay panimuot.

Diha na si Jackie sa sulod sa iyang sakyanan sa dihang nabalikan siya sa panimuot. Maoy una niyang nakita si Ethan nga nagpisilpisil sa iyang kamot.

“S-si Cesar Palomo,” ni Jackie pa nga nahinumdom sa gibuhat sa maong lalaki kaniya. -- Sumpayan pa