Naghilak nga Bituon

Nakatultol si Jackie sa resthouse sa producer sa Tagaytay kay naka-shooting na sila’g pelikula sa maong dapit.

Pag-abot nila sa resthouse gisugat sila sa duha ka bodyguard ni Cesar Palomo. Gieskortan si Jackie sa duha paingon sa sulod sa resthouse. Si Ethan nagpabilin lang sa sulod sa sakyanan.

“Dili na lang ko magliko-liko sa akong tuyo, Jackie,” nagkanayon si Mr. Palomo sa dihang nagkaatubang na sila. “Hatagan ko ikaw og dakong movie project apan ubos sa usa ka kondisyon.” “U-unsa nga kondisyon, Boss?” Sukit ni Jackie.

“Hatagan ko ikaw og double nga talent fee sa pelikula nga imong himuon. Apan kinahanglang itugyan mo kanako ang imong pagka-babaye.”

“H-ha!?”

“Dugay ra kong naibog nimo, Jackie. Dili man sab tingali ko nimo angay hikawan sa akong gusto tungod kay tugbangan ko man kini og dakong proyekto sa big screen. Dako pa gyud ang talent fee nga akong ihatag nimo.”

“Sorry, Boss,” miprangka si Jackie uban ang pagyam-id. “Pero nasayop tingali ka sa pag-offer nako sa maong pelikula. I-offer na lang kana sa lain.” -- Sumpayan pa

Ang sinugdanan anaa sa kataposan

Ni Rosalie Vallecera

“Wa na man ka tungaha sa imong Mr. Right, sis?” Sukit ni Alexa usa ka higayon niana nga nagkasulti sila si Colleen sa sala.

Nakamatikod na diay si Alexa sa pagtangaw ni Brendan.

“Mr. Right ba uroy,” mao ray nabungat ni Colleen.

“Nag-away mo?”

“Wa man.”

“Unya, nganong wa na man siya moanhi sa ato?”

“Ambot niya. Aw, wa tingali makahigayon.”

“Wa sab mo-text?”

“Wa sab.”

“Suwayi’g text. Pangumostaha.”

“Di ko, uy. Ako gyu’y mouna? Hayahaya niya, no?”

“Ngano man gud diay? Okey ra man na, ba. Managtrato na gud mo.”

“Bahala siya sa iyang kinabuhi.”

Wala na motubay si Alexa sa gisulti ni Colleen. Igo na lang kining mitutok kaniya.

Karon pa makaamgo si Colleen nga daghan diay kaayo ang mga komplikasyon nga mahitabo sa pagpakigrelasyon sa usa ka lalaki nga wala niya higugmaa. Usa na niini kining nahitabo tali kanila ni Brendan karon. Wala na sila’y komunikasyon kay nangluod si Brendan tungod lang sa usa ka gamay’ng butang nga iyang gihikaw ngadto niini -- wala niya pahagka! -- Sumpayan pa