“Ingna si Direk Wenn nga nagpasalamat ko sa iyang tanyag,” nagkanayon si Jackie. “Pero wala ko mangandoy nga mahimong bold star.”
“J-Jackie...?” Nakugang ang manager sa iyang gisulti.
“I’m sorry. Pero bahala na’g wala ko’y pelikula, dili nako isugal ang kataposan kong baraha.”
Adlaw’ng Domingo. Nanawag kang Jackie si Cesar Palomo, ang executive producer sa Ore Films nga maoy naggaling sa pelikula nga nakapahimo kaniyang best actress sa Pilipino Film Festival.
“May movie project ko alang nimo,” matud sa prodyuser nga usa pud ka Bisaya.
“W-wa ka ba magtiaw, Boss?” Mora’g maglisod pagtuo si Jackie.
“Yes. Magkita ta ugma sa akong resthouse sa Tagaytay aron atong sabotan kining maong proyekto. Ayaw lang pahibaw-a ang imong manager mahitungod niini. Ikaw ra ug ako ang magsabot okey?”
“O-okey, Boss...”
Pagkaugma, sayong migikan sila si Jackie ug Ethan sa Laguna paingon sa Tagaytay aron pagpakigkita ni Cesar Palomo. -- Sumpayan pa