Ang huwes nga istrikto

Don’t tell me stories, counsel! You invoke the law!” mando ni Judge Mario Andal, huwes sa Municipal Trial Court sa lungsod sa Machado. Manghod sa singka iyang tuno. Isog og tinan-awan sa abogado. Bag-o lang natawag ang kaso ni Ben Villa, akusado og estafa nga kliyente ni Atty. Rey Galo. Nakapanglab-ok og laway si Rey nga nagbarog nga nagtutok sa huwes. Wa siya magdahum nga ingon ini ang isulti sa huwes.

Kay wa pay tuig ning huwesa nga natudlo ining husgadoha. Wa pay kwarenta ang pangidaron sa huwes. Unya si Rey singkwenta i-singko na. Sukad masukad, karon pa siya kasugat og huwes nga ingon ini ang isulti sa abogado.

Si Ben nakasuhan og estafa kay nagbaligya og depasaheroan nga dyip ngadto ni Chona Reyes. Sa pagpalit sa jeep, dala sa kondisyones ang pagpa-renew sa franchise kay public utility man ang maong dyip. Si Ben ang nipasalig nga mo-renew sa franchise. Apan wa katuman sa iyang pasalig. Kay nahutdan sa kuwarta dihang nadisgrasya si Charlie iyang manghod nga nadat-ogan sa paril kilid sa ilang talyer. P150,000 ang presyo sa dyip. Nabayran na si Ben apan nahurot dayon ang kuwarta. Gigasto sa pagka-ospital ni Charlie kay maoy pangabaga ni Ben sa iyang talyer. Ang sakyanan gihuptan na sa nakapalit. Nakiha og estafa si Ben sa opisina sa fiscaliya tungod sa pakyas niyang saad. Si Rey ang abogado ni Ben sa pagsugod pa lang sa kaso.

Gikan sa pag-file ni Ben sa iyang counter-affidavit sa opisina sa fiscal ug sa paghimo og clarificatory investigation, wa gyud nitunga si Chona. Apan nipasaka lang gihapon ang fiscal og kaso nga estafa sa husgado, bisan sa depensa ni Ben nga dili estafa ang kaso, kay ang transaksiyon usa lang ka palit diin wa katuman ang nagbaligya sa usa ka kondisyon.

Tungod kay dugay nga nabakante ang maong husgado (duha ka tuig nga way huwes) nikabat og kapin lima ka tuig nga pending ang kaso ni Ben. Gikan sa arraignment (pagbasa sa complaint, ngadto sa akusado unya mosulti siya’g sad-an ba o wala) sa pre-trial (panagsabotsabot kun maareglo ba ang kaso) ug sa unang adlaw sa pagpresentar og ebidensiya sa complainant si Chona way tungatunga sa husgado. Ang fiscal nga mao ra say abogado sa complainant, way nahimo. Nangayo siya’g postponement kay wala siya’y testigos.

Karon, ikaduhang adlaw na ang mopresentar unta og ebidensiya ang complainant, apan wa gihapon nitunga si Chona o testigos para niya. Nasayran na lang ni Ben gikan sa iyang higala nga nakapangahente sa sakyanan, nga gibaligya na sab ni Chona ang dyip sa laing tawo. Ug gihuptan na ang dyip sa bag-ong nakapalit. Nasuta na karon nga wa gyud diay interes si Chona nga motambong sa bista sa kasong iyang gipasaka. Mao ni ang gisulti ni Rey sa huwes aron ma-dismiss ang kaso kay nakalapas sa katungod ni Ben (right to speedy trial).

“May I say something, Your Honor” ni Rey sa mapaubsanon nga tuno. “Go ahead” sa huwes. “I have been a legal practitioner for more than 20 years, Your Honor. And during my court appearances, I never invoked the law to the Judges. Because judges, lawyers and even laymen are presumed to know the law. On my part, right now, as counsel for the accused, I told the stories to the Court about the actuations of the complainant as to how she violated the law. In this particular circumstance, the constitutional law vesting the right of the accused to speedy trial. I don’t want to insult the court by telling him what the law is. Because it would be like telling God what is in the Bible. So, Your Honor, that is why I have to tell stories of how a certain litigant had violated the law,” ni Rey. Seryoso. Nakapahiyom og gamay ang huwes.

“We said counsel. But I would like to give one last chance to the prosecution to present its evidence. If in the next setting, still, it could not present evidence, I will order the dismissal of the case for lack of interest of the complainant. Is it alright with you, pañero?”sa huwes. “Fine with us, Your Honor” ni Rey nga nagbarog atubangan sa huwes sukad pa sa pagtawag sa kaso. “Nahanaw ang kaistrikto sa huwes sa imong gisulti.

 Sakto gyud kaayo ka” honghong sa usa ka abogado sa luyo ni Rey. Gipikpik niya ang abogadong batan-on nga nihunghong nga wa pa nailhi ni Rey. (Kataposan) (Sa gusto’g libreng kunsulta, dad-a ning pahina sa opisina sa tagsulat. Sa Sabado buntag)