Ang sinugdanan anaa sa kataposan

Gula 48

Kun si Cody pa kaha ang buot mohalok kaniya, walay daghang estorya. Walay daghang kuti-kuti. Magpatara dayon siya.

Mao kini gikalagotan ni Colleen sa iyang kaugalingon. Si Brendan ang iyang gikarelasyon -- ug maoy iyang kakuyog karon -- apan si Cody ang unod sa iyang hunahuna. Nabuang na ba siya sa iyang paghigugma kang Cody?

“I-I’m sorry, Brendan,” namulong si Colleen pagkilab sa pipila ka gutlo nga wala gayod magtingog ang ulitawo. Gibuhian niini ang iyang kamot.

“Okey lang,” ni Brendan sa tingog nga milubad sa kahiubos.

“Brendan, it’s my first time to have a boyfriend,” gipasabot ni Colleen ang ulitawo. “Dili pa ko anad sa ingon niini.”

“Nakasabot ko, Colleen,” ni Brendan pa. “Wa kay angay kabalak-an.”

Mora’g parehang nawala ang mood nila ni Colleen ug Brendan. Managsama silang wala na ganahing mitan-aw sa pelikula. Maong nagkasabot silang manggawas na lang sa sinehan.”

“Manuroy pa ba ta?” sukit ni Brendan sa didto na sila sa gawas sa sinehan.

“Mamauli na lang ta,” daling hukom ni Colleen.

“Sige,” ni Brendan. -- Sumpayan pa