Sugilanon Sinagop

Walay ulaw. Sinagop lang kita. Way igaba....” kalit nga naputol ang pangasaba ni Ramon ngadto ni Carding. Naglisud kini pagginhawa. Naluspad, nawad’ag umoy, nalup’og ug nawad’an sa panimuot.

Gidala dayon ni Carding si Ramon sa ospital ug gitawgan si Layla. “Imong papa Ramon, gikuyapan, ug ania kami karon sa ospital.”

Didto na sa San Isidro District Hospital makabaton og panimuot si Ramon.

“Kumusta na ang imong pamati Dad?” ni Layla.

Wala motubag si Ramon, ingon sa may gipangita.

“Wala dinhi si Carding Dad!, nipalit og tambal. Maayo gani nadala ka dayon dinhi sa ospital. Luya diay ka’g kasingkasing. Una siya molakaw iya kong gisuginlan sa imong kalagot ug panudya. Gipakaulawan mo siya tungod sa imong pagduda nga siya maoy amahan niining akong gimabdos. Dili ko ikaw mabasol. Ang akong linihukan kadudahan. Naibog ug nahigugma ako niya sa hilom. Malipayon akong motugyan sa akong kaugalingon ngadto kaniya. Daku ang akong pagsalig nga magmalipayon ako sa iyang bukton. Sukad pa sa among pagkabata nakita ko na kaniya ang mga hiyas sa lalaki nga akong gipangandoy nga mahimo kong pakamatyan. Akong namatikdan nga si Carding may gitago sab nga pagbati ngari kanako. Ang nakaapan, wala siya mangahas pagsulti niini. Gisakripisyo ang iyang katungod, tungod sa iyang pag’-ila ug pagtahud sa iyang pagkasinagop.” ... patin-aw ni Layla.

Misugod na sa pagpalugmaw ang luha ni Layla nga mipadayon: “Ang wala lang nimo masayri Dad, nga gilumsan ang imong hunahuna sa mga tabitabi nga si Carding maoy amahan niining akong gimabdos. Hisabtan ko ang imong kaguol. Kinaiya lang na sa usa ka amahan nga nangandoy sa kaugmaon sa iyang anak. Ang tinuod nga panghitabo Dad mao kini; hapit mamatay si Carding sa bun’og nga iyang nadawat gikan ni Rudy ug sa tulo ka barkada niini. Walay nahimo si Carding pagpanalipod kanako sa dihang gitabangan siya pagbukbok ni Rudy ug kauban. Gilung’an lang siya pagbukbok dihang gituohang patay na. Naboong gyud ang akong pagkababaye sa linugos nga paagi. Wala ko makahibalo kinsay amahan sa akong gimabdos kay ang upat nakapahimulos man kanako niadtong higayona. Ang maong hitabo hisabtan ni Carding, ug amo nalang gitago sa kahadlok nga maangin ka, kay si Rudy; anak sa imong kumpare nga kontrabandista sa Barangay Tanke, nga gusto unta nimo nga akong mabana, walay gitahud ug maoy gidudahan nga pangulo sa mga krimen nga wala masulbad dinhi sa atong Barangay San Rafael.”

Nituhop sa kasingkasing ni Ramon ang mga pulong ni Layla. Nakaamgo sa dakung kalainan ni Rudy ug Carding. Si Rudy, nagsalig lang sa kinitaan sa iyang amahan, walay nahuman nga kurso, barkada ray giatiman, abusado nga pagkatawo. Samtang si Carding nga iyang sinagop, mograduwar na sa inhenyero sa elektrisidad ug matugtanong motugyan sa iyang kinabuhi alang sa iyang anak.

Sa walay pagduhaduha, gisangpit ug gihangyo ni Ramon si Laya: “Inigbalik ni Carding, sultihi siya nga kinahanglan pakaslan ka niya. Dili ko gusto nga matawo ang akong apo nga walay ilhong amahan, sama kaniya nga gibilin lang sa pultahan sa simbahan.”

Napalukso si Layla sa kalipay. Wala nay kakulian ang pagkasinagop ni Carding sa pagpadayag sa ilang tagsatagsa ka tinagoang pagbati. (Katapusan)