Gula 88
Gitan-aw ni Jackie ang relo sa iyang bukton. Nakapanglingo siya. Nabalaka siya nga ma-late sa sabot nila ni Joy Lorenzo. Busa nakahukom siyang pangunayan na lang niya ang pag-ilis og ligid sa iyang sakyanan.
Gikuha dayon niya ang toolbox gikan sa gibutangan niini. Gisugdan na niya pagtangtang ang ligid sa sakyanan sa dihang may lalaking miduol kaniya ug mitanyag og panabang. Apan nakugang si Jackie sa iyang paglingi ngadto niini.
Si Ethan!
Nakugang usab si Ethan sa dihang nagkatagbo ang mga tinan-awan nila ni Jackie. Ingon sa kandela ang ulitawo nga giugbok sa gibarogan niini, wala makalihok nga nakalitan sa pagkakita kaniya.
What a small world! Tuaw ni Jackie sa hilom nga ingon sa dili makatuo nga magkita sila si Ethan niining wala damhang higayon.
“Kumosta?” Pormal ang nawong ni Jackie nga nangutana.
“M-maayo man,” may kataha ang tuno sa sinultihan sa ulitawo.
“Mamalihog ko nimo sa pag-ilis og ligid ning akong sakyanan,” ni Jackie pa. “Wala ko’y laing masangpit gawas nimo. Nagdali ko. Ayaw kabalaka. Bayran tika sa imong kahago.” -- Sumpayan pa