Ang sinugdanan anaa sa kataposan

Gula 45

Wala motingog si Colleen. Imo ra nang hunahuna. Mao kanay imong pagtuo. Pero kun nasayod ka pa lang sa matuod nga hinungdan sa pagpakigrelasyon ko kang Brendan, ambot kun unsay imong buhaton. Didto molanog kining maong mga pulong sa kahiladman ni Colleen.

Hangtud karon, napuno sa pagpakaaron-ingnon ang pagpakigrelasyon niya kang Brendan. Wala pa gayod siya mobati’g paghigugma ngadto sa lalaki. Lisod gayod kaayong tudloan ang kasingkasing ni Colleen. Gitudloan niya kining mahigugma kang Brendan. Apan nagpabilin nga si Cody ang gipitik niini.

Wala bay buot ang gugma? O may gahom ang gugma sa pagmando sa kabuot sa tawo maong naingon siya niini?

“Boto baya ko ni Brendan para nimo, matud ni Cody. “Sa   akong paniid, kasaligan kanang tawhana.”

“Salamat,” niya pa. Pero wala niya ikahimuot ang komento ni Cody kalabot sa relasyon nila ni Brendan. Kay ang gusto niyang mahitabo mao nga magselos si Cody kanila.

Migawas si Alexa gikan sa kuwarto niini ug miduol kanila.”

“Adto na ta,” ni Alexa pa ngadto kang Cody.

“Sige,” sanong ni Cody.

“Ikaw nay bahala dinhi, Sis,” ni Colleen ang girumbo sa gisulti si Alexa. -- Sumpayan pa