Naghilak nga Bituon

Wala na mokuha og laing driver si Jackie nga makapuli ni Noy Teryo. Gipangunayan na lang niya pagmaneho ang iyang sakyanan. Maantigo na man siyang modrayib kay gipakuha man siya kaniadto og mubong kurso sa driving sa iyang manager kay importante man sa usa ka artista sama niya nga makamao siyang momaneho og sakyanan aron dili siya maglisod sa mga esena nga ingon niini sa pelikula.

Dili kaayo kusog ang pagpadagan ni Jackie sa iyang Expidition samtang gisubay niya ang lapad nga South Superhighway. Sayo pa kaayo ug wala siya mabalaka nga ma-late sa appointment niya kang Joy Lorenzo. Mao nga wala kaayo siya magdali. Defensive kaayo ang iyang pagmaneho sa sakyanan.

Duol na siya sa Mantrade sa dihang mihiyos ang pangunang ligid sa iyang sakyanan. Napugos siya sa paglugar sa daplin ug mihunong.

Mikanaog si Jackie ug gisusi ang ligid sa sakyanan. Na-flat gayod kini. Kinahanglang mag-ilis siya’g ligid aron makapadayon siya sa pagbiyahe.

Mibarog siya sa daplin sa karsada sa luyong bahin sa nag-urong niyang sakyanan. Mipara siya sa mga sakyanan nga miagi sa iyang tungod aron unta magpatabang sa pag-ilis sa ligid sa iyang sakyanan. Apan wala’y usa nga nagpakabana kaniya. Gisayloan lang siya sa mga sakyanan nga iyang gipara. -- Sumpayan pa