Naghilak nga Bituon

Gula 86

“M-may mga gamit ka pa nga nahibilin sa akong awto.”

“Bahala ka na sa maong mga butang. Sunoga kadto kun mahimo. Basta ayaw na gyud ko’g samoka.”

Pipila lang ka sapot ug pahindik ang sulod niadtong bag niya nga nahibilin sa sakyanan ni Julio. Gawas sa maong mga gamit, wala nay importanteng butang sa sulod sa maong bag. Mao nga wala nay bale alang kang Jackie kun dili na mahibalik kaniya ang maong mga gamit.

Ang importante mao nga dili na sila magkakita si Julio!

Milabay ang usa ka semana. Sayong mibiya si Jackie sa townhouse sakay sa Expidition nga gipangunayan niya pagmaneho.

Bag-o lang mibiya si Noy Teryo sa trabaho niini isip personal driver ni Jackie. Nagkagrabe na ang sakit nga arthritis sa lagas ug nakahukom na kining mopauli sa Sugbo.

Nakasabot si Jackie sa kahimtang ni Noy Teryo mao nga iya kining gitugotan nga makapauli. Iya kining gipabawonan og dako-dakong kantidad sa kuwarta nga magamit niini sa pagpatambal ug alang usab sa mga kinahanglanon sa pamilya niini didto sa Sugbo. -- Sumpayan pa