Ang sinugdanan anaa sa kataposan

Gula 43

Nga dili tinuod nga “sweet yes” alang kaniya.

“Dili ba mao kini ang dugay mo nang gipaabot?” Sikmat ni Colleen.

“T-tinuod kana. Pero...”

“Manghinaot ko, Brendan, nga wala ko masayop ning nakab-ot kong desisyon. Ampingi ang atong relasyon.”

“Isaad ko, Colleen. Ampingan ko ang atong relasyon. Ug paningkamotan ko nga mahimong angayan sa imong paghigugma.”

Wala motingog si Colleen. Gugma? Wala siya’y pagbati nga ingon niini ngadto kang Brendan. Gidawat lang niya ang gugmang gihalad niini kaniya gumikan sa iyang kahiubos sa kapakyasan sa iyang gugma ngadto kang Cody. Si Brendan ang gihimo niyang kasangkapan aron mahikalimtan niya si Cody.

Nasayod siyang sayop kining iyang gibuhat. Nasayod siyang sayop ang pagpanggamit sa laing tawo aron lang matuman ang selfish niyang motibo. Pero wala siya’y laing mahimo. Gipangayo kini sa panahon. Pasayloon lang unta siya ni Brendan sa higayon nga makasabot na kini sa lintunganay niyang tumong.

Sa laing bahin, paningkamotan usab niya nga makakat-on na lang sa paghigugma kang Brendan. Puslan man nga nakigrelasyon na siya niini, tun-an gayod niya ang iyang kaugalingon sa pagmahal ni Brendan aron magmalipayon siya sa ilang relasyon.-- Sumpayan pa