Naghilak nga Bituon

Gula 85

Sa nakasulod na siya sa iyang lawak, milahos siya sa mahunolhunol nga kama ug mihigda. Giumod niya ang iyang nawong sa unlan. Wala niya kapugngi ang paghilak. Gipahungaw niya pinaagi sa pagpaagas sa iyang mga luha ang kalagot ug kahiubos nga iyang gibati ngadto kang Julio.

Mibagting ang cellphone nga gisulod sa iyang shoulder bag. Iya kining gikuha ug gisusi. Si Julio ang nanawag. Iya kining gitubag.

“J-Jackie, I-I’m sorry,” maoy unang mga pulong migawas gikan sa mga ngabil ni Julio didto sa pikas tumoy sa linya.

“Damn you, Julio!” Nagkurog sa kalagot si Jackie samtang namulong. “Wala ko magdahom nga ingon ka diay niana ka salbahis. Karon ako nang nasayran nga ang ako ra diay’ng lawas ang imong giapas.”

“Nasayop ka, Jackie. Gihigugma ko ikaw. Pasayloa ko sa akong gibuhat kaganina. Nadala lang ko sa akong gibati.”

“Mapahimuslanon ka gyud sa higayon.”

“J-Jackie...”

“Gitapos ko na ang tanan tali kanatong duha. Hangyoon ko lang ka nga ayaw na ko’g samoka kun dili ka buot nga ibulgar ko sa publiko ang imong gibuhat kanako.” -- Sumpayan pa