Ambisyosa

Gula 6

“Sayo ko nga migrahe karon kay nasayud ko nga gikan pa kamo sa probinsya, lab-as pa kaayo,” nagpahiyom ang taxi driver. “Unsay lab-as?” daw misaka ang tingog ni Lenie.

Sa ila gud sa Mindanao sagad isda maoy tawgon og lab-as. “Ang buot ko nga ipasabut nga gusto ko nga ako’y makauna nimo karong gabhiona,” matud sa taxi driver nga miagbay dayon ni Lenie.

Abtik nga giwakli ni Lenie ang bukton sa taxi driver nga mitugdon sa iyang abaga. “Unsay pagtoo nimo nako?” misamot pagsaka ang tingog sa dalaga. “Lenie, wala ka ba diay tug-ani sa imong trabaho dinhi sa casa?”

Gitug-anan sa taxi driver si Lenie nga ang paglingaw sa mga lalaki maoy iyang trabaho. Naniga ang mga mata ni Lenie pagkasayud niini. Mihilak siya sa kaguol nga nahitumpawak siya sa hiwi nga dalan tungod sa iyang ambisyon nga moasenso.

“Dali na kay kaganina ra kong buntag nga naibog kaayo nimo dihang misakay ka sa akong gimaneho nga taksi,” matud sa taxi drayber dungan sa paggunit sa kamot sa dalaga. Apan giwakli siya ni Lenie.

Nahagit ang drayber. Gigakus siya og hugot kaayo. Milimbag pag-ayo si Lenie apan wala magsilbi ang iyang kusug. Dali rang nawad-an og umoy si Lenie tungod sa hugot nga gakus sa taxi driver.

Wala siya’y laing nahimo gawas sa paghilak apan gibaliwala ra kini sa taxi driver nga ang bugtong tumong mao ra ang pag-angkon sa iyang pagka babaye. Napusgay g’yud ang pagkababaye ni Lenie sa ikaduhang higayon.

“Five hundred lay akong i-tip nimo Lenie. Mora’g duna na may nakauna nimo. Pero sagdi lang, suki na ta ha?” matud sa taxi driver nga mitunol sa tip niya ngadto kang Lenie. “Ako diay si Rommel. May gibayad ko nga one thousand pesos sa kahera, may bahin ka pa ato Len.”

Wala na mobalik si Lenie didto sa Internet Café. Misulod siya sa kwarto nga gipahigdaan kanila ni Cardo. Nakahilak si Lenie sa iyang gidangatan. Hinoon, nahuna-huna niya nga sa usa lang ka adlaw, mikita na siya og P5,500.

May miable sa pultahan sa kwarto. Ang kauban diay niya nga daan nang nagtrabaho sa casa. “Lenie, may lain kang customer Day. Hayahaya nimo uy mora ka man og hot cake, ayaw pagdugay kay Insik ra ba na, kwartahan,” matud sa    babaye.

Nahuna-huna ni Lenie nga puslan man nga pusgay na ang iyang pagka babaye, paundayonan na lang niya ang iyang kapalaran. (Sumpayan)