Ang sinugdanan anaa sa kataposan

Gula 42

Gusto ni Colleen nga ang iyang gibati alang kang Cody adto niya ipahungaw kang Brendan. Namasin siya nga sa kadugayan makakat-on ra siya sa paghigugma niini ug hingpit na niyang mahikalimtan si Cody.

Gihinuktokan ni Colleen sa makadaghan sa wala pa niya ipakanaog sa hingpit ang maong hukom. Iyang nasuta nga sa iyang kahimtang karon, si Brendan na lang ang iyang last recourse.

Nakaamgo siya nga dili na gayod siya angay pang molaum nga mahigugma si Cody kaniya, kinahanglang atubangon niya ang kamatuoran nga si Cody dili alang kaniya ug dawaton ang matuod sa tumang pagpaubos.

Dili siya angay nga magpaulipon sa iyang gibati kang Cody. Her heart must go on bisan wala si Cody. Anaa si Brendan nga nagmahal kaniya ug nagpaabot lamang nga iya usab nga mahalon.

Mao nga sa sunod nilang panagkita ni Brendan, gidawat na ni Colleen ang gugmang gihalad niini kaniya. Nalipay pag-ayo ang ulitawo. Apan kun unsa ka dako ang kalipay nga gibati ni Brendan, tipik lang tingali niini ang kalipay ni Colleen. Kay alang kaniya, si Brendan maoy tapak lang sa kahaw-ang nga gimugna ni Cody sa iyang kasingkasing.

“Ingon sa dili ko makatuo sa nakab-ot mong desisyon, Colleen,” ni Brendan nga ingon sa wala magdahom nga mabati na niini ang iyang sweet yes. -- Sumpayan pa