Ambisyosa

Gula 5

“Ayaw na paghilak Lenie. Ingon usab niana ang ubang babaye nga ania karon dinhi sa casa apan sa ngadto-ngadto wala sila magmahay,” giingnan ni Cardo ang dalaga.

Gidudho g’yud pagtunol ni Cardo ang singko mil pesos ngadto kang Lenie. Gidawat na lang usab ni Lenie ang kwarta. Gisul-ob niya ang iyang sinena. “Mogawas na ko,” giingnan ni Lenie si Cardo.

May gipislit si Cardo ilawom sa iyang lamesa ug dayon nadungog ni Lenie nga mihagtik ang siradora sa pultahan. Gitrapohan ni Lenie ang iyang mga mata sa luha ug migawas siya sa kwarto ni Cardo.

“Unsay tuyo ni Boss Cardo nimo Day?” hapit magkadungan og pangutana ang mga kaubang babaye ni Lenie gikan sa Mindanao. “Wala niya tug-ani sa nahitabo kaniya.”

Pagka-gabii na, daghan nang mga tawo ang midugok sa Internet Café. Gawas kanila ni Lenie ug kaubanang mga babaye nga gikan sa Mindanao, may laing mga babaye nga nangabut.

Puwa kaayo’g mga ngabil ang maong mga babaye. Ang uban kanila mitupad paglingkod sa mga lalaki nga misulod sa Internet Café. Unya may lalaki nga miabot nga daw sinati ni Lenie ang panagway.

Gipalihok ni Lenie ang iyang utok aron sutaon kun diin niya ikakita ang lalaki nga bag-o lang misulod sa Internet Café. Miliraw usab ang mga mata sa lalaki sa palibut ug miduol sa kahera nga naglingkod sa lamesa.

“Lenie, may nangita nimo,” gitawag si Lenie sa kahera. “Uy, wala na ko makaila da… misamot ka kagwapa sa imong gisul-ob,” giingnan si Lenie sa lalaki. Wala pa gayud makahinumdom si Lenie kun diin niya ikahimamat ang maong lalaki.

“Wala ka na diay makaila nako? Sige tug-anan ko ikaw karong taud-taud,” matud sa lalaki nga mikuot sa iyang pitaka. Nakita ni Lenie nga mitunol kini og tibuok usa ka libo ka pesos ngadto sa kahera. “Adto mo pag-estorya sa Room 6,” giingnan sa kahera ang lalaki dungan sa pagtunol sa yawe. “Asa ta? Unsay atong panagsultihan?” daw inosente g’yud si Lenie nga wala masayud sa iyang dangatan kun mouban siya sa maong lalaki.

Misunod lang siya sa giingon nga Room No. 6. Giablihan sa lalaki ang kwarto nga gipaandar na diay daan ang air-con. Gikuyawan si Lenie kay sila ra didto sa kwarto. “Lingkud, Lenie diay ang imong ngalan? Ako kadtong drayber sa taksi nga gisakyan ninyo ganina gikan sa pantalan,” paila sa lalaki. (Sumpayan)