Gula 83
“Nasayod ko sa kinabuhi sa usa ka artista Jackie. Aware ko nga ang usa ka artista posibleng mahimong kabit sa iyang manager, producer o ba kaha sa direktor.”
“Kun mao kanay imong gituohan, nganong nakigrelasyon ka man nako? Gawas pa, ayaw i-angin ang ubang mga artista tungod kay dili ang tanang taga showbiz naghimo og ingon niana. Aduna gihapoy mga artista nga nag-amping sa ilang kadungganan.”
Apan ingon sa wala na mamati si Julio sa gisulti ni Jackie. Kalit siyang gibitad niini paingon ngadto sa kama. Milugnot siya. Apan gigakos siya’g hugot kaayo ni Julio samtang giukoban niini ang iyang mga ngabil.
Mikisikisi si Jackie. Milugnot siya’g maayo sa tinguha nga makalingkawas gikan sa paggakos ni Julio kaniya.
Mipatigbabaw ang awareness ni Jackie nga daotan og tuyo si Julio kaniya. Desidido kini sa pagkutlo sa iyang pagka-babaye ug ingon sa buhaton gayud niini ang tanan aron molampos sa tuyo niini kaniya.
Apan dili siya makatugot nga mahulog sa mga kamot ni Julio niining higayona. Bisan nahigugma siya niini apan gusto niyang isurender ang iyang kaputli ngadto niini sa unang gabii sa ilang kasal kun mosangko man gayod sa kaminyoon ang ilang relasyon. -- Sumpayan pa