Ambisyosa - Gula 3

Wala kaayo’y mga customers nga misulod sa Internet Café. Taud-taud mitingog ang Intercom ug gitubag sa babaye nga naglingkod sa lamesa. “Kinsa’y Lenie?” nangutana ang babaye, “Paadtoon ni Boss Cardo sa iyang kwarto.”

Gikulbaan si Lenie kay basin og unsay isugo kaniya ni Cardo nga mao na ang ilang agawon. Nanuktok si Lenie ug nadungog sa dalaga nga mihagtik ang lock sa pultahan.

Pag-abli niya sa pultahan didto ra si Cardo sa layo nga lamesa naglingkod. Apan dihang nakatalikod na si Lenie sa pultahan nadungog niya nga mihagtik pagbalik ang lock sa pultahan, mora’g dunay tawo nga mi-lock niini.

“Unsay imong isugo nako Noy Cardo?” ni Lenie pa nga daw gipanguyawan. “Hatagan ko ikaw sa imong pasiuna nga sweldo bisan og karon ka pa makasugod sa pagtrabaho,” matud ni Cardo nga miabli sa drawer sa iyang lamesa.

Mitindog si Cardo sa gilingkoran niya nga silya nga tuwang-tuwang ug milingkud tupad ni Lenie. Kay wala lagi maanad nga makigtupad og lalaki, gigil-asan si Lenie ug mihana pagsibog.

Mipahiyom si Cardo. “Dawata kining P5,000 Len ug kun makagusto ko sa imong performance mahimong ang gisaad ni Laura nga P10,000 nga sweldo nimo matag buwan, himoon ko nga P20,000. Ayaw lang pagsaba sa imong mga kauban.”

“Ha? Kadaku ana nga kantidad Noy Cardo?” nakalitan ug daw dili siya makatoo. Giagbayan siya ni Cardo sa tuo nga bukton ug gihikap sa wala nga kamot ni Cardo ang iyang suwang.

Daw nagbutok-butok sa kakulba ang dughan ni Lenie kay gikuyawan siya. “Noy Cardo, ayaw pangagbay Noy.” Apan wala mopatoo si Cardo ug hinoon gihagkan si Lenie.

Mikalit pagtindog si Lenie ug midagan sa pultahan. Gidali niya pagtuyok ang siradora apan dili kini maabli. Lock ang pultahan. “Balik ngari Len, ayaw kahadlok. Dili ka makaabli niana kay automatic lock kana,” ni Cardo pa.

Gikulbaan pag-ayo si Lenie. Daw nakabantay siya nga dunay dautang tuyo kaniya si Cardo. “Malooy ka Noy Cardo, ayaw tawon ko’g binuangi,” nagpakilooy si Lenie.

“Duol diri Len, mag-estorya ta. Ayaw kahadlok kay manarbaho ka man kaha nga dagku og makwarta,” matud ni Cardo. Kahilakon na si Lenie sa kakuyaw kay namatud-an na g’yud niya nga may dautang tumong si Cardo kaniya.

Mitindog si Cardo ug giduol si Lenie nga nagtindog sa usa ka bahin sa kwarto duol sa pultahan. Daw giam-aman siya ni Cardo, gihapohap ang buhok ug gihagkan pag-usab. (Sumpayan)