Ang unang komunyon ni Jun Riel

Dugay kaayong nakatulog si Jun Riel nianang gabhiona. Gitun-an man gud niya pag-ayo ang mga pangadyeon nga gipakopya kanila ni Miss Bernadeth N. Muñoz, ang ilang maestra sa relihiyon.

Lakip niyang gitun-an ang iya unyang igsusulti ngadto sa pari nga maoy mopakumpisal kanila, inigkaugma didto sa kapilya sa Daantabogon. Tua man gud siya magtungha sa Daantabogon Elementary School, isip Grade One. Mao nga adto usab sa kapilya sa Daantabogon magpakumpisal ang pari.

Gikatakda man gud ugmang adlawa, adlaw nga Biyernes, nga mao ang adlaw alang sa ilang unang komunyon. Nahimo ganing espesyal ang maong adlaw, kay gituyo man gayud kini pagahin alang niadtong wala pa gayud makasulay og kalawat. Hasta pagkumpisal, ilabi na niadtong nanagtungha sa elementarya.

Nianang pagkaugma, sayo kaayong mibangon si Jun Riel. Human niya’g hipos sa iyang gihigdaan, naligo dayon siya didto sa sulod sa ilang banyo.

Apan samtang naligo siya, nagsigi sab siya og sanasana sa mga pangadyeon, nga magamit kaayo sa iya unyang pagkumpisal. Gisanasana usab niya ang mga igsusulti niya sa pari, sa dili pa siya manugid sa iyang mga sala, ug hangtod ang igsusulti niya, inigkatapos niya’g panugid.

Gihunahuna usab niya pag-ayo, ang mga sala nga iyang nabuhat. Ang mga sala niyang binyal ug ang sala niyang mortal, kun duna man. Giingnan man gud sila sa ilang maestra sa relihiyon, nga si Miss Bernadeth N. Muñoz nga pahinumdoman kuno ang ilang mga sala, aron sayon ra kaayo nila kining ikasugid ngadto sa pari, nga maoy magpakumpisal kanila.

Unya, may misantop sa iyang hunahuna ni Jun Riel. Nakaingon siya sa iyang kaugalingon, nga dili tingali maayo nga itug-an niya ang tanang nahimo niyang sala ngadto sa pari. Labi na gyud kadtong mga sala, nga angay niyang ikauwaw.

Sa hunahuna pa ni Jun Riel, nga kun itug-an niya ang tanan nga nahimo niyang sala, mahibawo na lang unya ang pari niini. Ilabi na niadtong mga sala niyang nahimo nga dili gayud unta maayong mahibaw-an sa uban.

Mauwaw man sab gud siyang mahibawo ang pari sa uban niyang sala,nga maingon tang dinagko, kay kaila ra ba kaayo niya kini. Pirme man gud mobisita ang pari sa ila, kay suod man kaayo kini sa iyang mga ginikanan.

Naglibog na lang hinuon si Jun Riel, kun unsa gayuy iyang buhaton. Itug-an ba niya ang tanan niyang mga sala o dili ba? Hangtod nga miabot na lang hinuon sa iyang hunahuna, nga mas maayo pang dili na lang siya mokumpisal.

Apan sa laing bahin, nahunahunaan usab niya, kun unsa unyay mahitabo, kun mahibaw-an siya sa ilang maestra sa Grade One, nga si Mrs. Lerio, nga wala diay siya mokumpisal. Tingali unya’g maapektohan ang iyang nota, kun grado. Nasayod man gud siya si Jun Riel, nga dili gyud malipay ang ilang maestra kun mao gayud kadto’y iyang buhaton. Ang dili pagkumpisal.

Sa didto na sila sa kapilya, wala dayon motipon si Jun Riel sa ubang mga kabataan nga nanaglinya aron sa pagkumpisal. Maayo gani, kay nakit-an siya sa ilang maestra sa relihiyon. Ug gipatipon siya sa mga bata nga nanaglinya, aron mokumpisal. (Kataposan)