Naghilak nga Bituon

Gula 81

Wala mokihol si Jackie. Mikanaog pag-una si Julio sa sakyanan ug giablihan ang pultahan sa iyang tungod apan wala siya maggunok.

“Jackie, com’ on,” apura ni Julio.

Mihinay pagkanaog si Jackie sa sakyanan. Ug giagbayan siya niini paingon sa sulod sa motel. Sa counter, nagpa-check in sila. Milingiw si Jackie sa dihang mitutok kaniya ang babaye nga nagbantay sa counter. Nabalaka siya nga tingalig nakaila kini kaniya.

Misaka sila sa ikatulong andana agi sa elevator human ikahatag sa tig-alagad sa counter ang yawe sa ilang lawak. Pag-abot nila sa tungod sa pultahan sa lawak numero 912, mihunong sila. Gipasok dayon ni Julio ang yawe ngadto sa yawehanan sa pultahan.

“Tana,” agda ni Julio dihang naabli na ang pultahan. “Mosulod na ta.”

“J-Julio...” Mikurog ang tingog ni Jackie.

“Jackie, naunsa ka ba. Mag-estorya ra man bitaw ta. Importante lang kaayo ang atong panagsultihan mao nga gikinahanglan nato ang privacy.”

Bug-at ang mga tiil ni Jackie nga misulod sa lawak. Gitak-opan ni Julio ang pultahan sa dihang didto na sila sa sulod.

“Unsay atong panagsultihan?” Sukit dayon ni Jackie. -- Sumpayan pa