Gahi pa sa tul-an sa kabaw kun maoy lat-an

Nahimong sumsoman sa mga silingan ni Porlang nga sa pagkatiguwang na niyang dalaga nga sobra pa gani nga nabiyaan sa tren, gidaginot gihapon siya og pangasawa ni Bartolo nga ila ra usab nga silingan ning ilang balangay sa Tinubdan.

"Sa gabii unya Bartolo ... human sa atong kasal ipakita ko kanimo, kun dili ka ba magdin-a sa katagbaw kun unsaon ko ikaw pagromansa nga labaw pa sa mga batan-on nga dalaga" dihay panganti ni Porlang sa iyang umaabot nga pamanhonon.

"Masuway baya Mahal kong Porlang!" dason nga tubag ni Bartolo.

Ambot unsay nasulod sa ulo ni Bartolo nga desidido man siya nga mangasawa kang Porlang? Bukog na lang gani ug panit ang mitapot sa iyang lawas, ug hilabihan gayod nga dauta nga sud-ongon. Maayo unta bisan niwang ang iyang kalawasan, kun guwapa? Adunay uban nga ilang silingan ... nga basin gilumay kini si Bartolo nga nadani man kang Porlang nga daghan man unta nga mga batan-on nga babaye nga angay kapilian ni Bartolo?

"Mahimo pa baya anak ... nga dili ninyong duha ihinayon ang gikatakda nang kasal ninyo ni Porlang? Seguro gayod nga maputos ka sa mga saway nga mangasawa og tiguwang nga dalaga?" nagpusot-pusot ang pahimangno sa inahan ni Bartolo.

Alang kang Bartolo ... maliso pay buko sa kawayan, kon dili niya ipadayon sa pagpakasal kang Porlang.

Sa gabii human sa kasal nila ni Bartolo ug Porlang luhag kaayo nga nagpangamay si Porlang sa iyang bana nga pasudlon og una sa sibay diin adto nila titia ang kataposang inagos sa ilang nagsuyla nga kagana sa kahidlaw.

Nabuntagan na lang og menaneho si Bartolo ... kun unsaon niya nga masangkad ang langit sa pagka-babaye ni Porlang ... apan dili gayud niya makaya.

"Unsa na Bartolo, nakita mo na ang resulta? Hinumdomi kanunay nga bisan sa kasapsing sa akong lawas ... dili gayod angay kapangandakan!" nagkanguhal ang tuno sa sinultihan ni Porlang.

"Karon ... imo na gyod nga nahibaw-an ang kamatuoran unsa diay ako nga klaseha nga pagka-asawa!"

Naamang sa makadiyot si Bartolo. Daw dili siya makatuo sa sinugdan ug igo lamang niya gihagawhawan si Porlang, diin siya nagkanayon:

"Nasipyat ko sa sinugdan sa akong gituhoan ... Porlang nga gahi pa man diay sa tul-an sa kabaw ang imong armas kun maoy lat-an!" (Kataposan)