Ang sinugdanan anaa sa kataposan

“Nganong miadto ka man sa lawod?” Sukna ni Alexa. “Lawom na kaayo tong dapit nga imong naabtan. Maayo gani kay nabantayan ka ni Yana. Kun simbako may daotan pang nahitabo kanimo, malintian gyud ko nilang Papa ug Mama.”

Wala siya motingog. Dili mahimong sultihan niya si Alexa sa matuod nga hinungdan kun nganong ingon sa buot na lang siyang magtubok sa lawod. Dili mahimong tug-anan niya ang iyang maguwang nga silang duha si Cody ang hinungdan sa iyang pagpinutong.

Nga gikahiubos niya ang ilang paglipay-lipay nga wala na gani sila magtagad kaniya. Nga nagkinahanglan siya sa ilang atensiyon. Apan ang ilang atensiyon didto ra sa tagsatagsa nila ka partner ug mao kini ang iyang gikahiubsan pag-ayo.

Nganong giluwas pa man siya? Importante pa ba diay siya alang kanila? Kinahanglan pa bang mahitabo ang ingon niini aron makuha niya ang ilang atensiyon?

“Si Cody ang nagluwas nimo,” asoy ni Alexa. “Dugay ka niyang nabangalan kay mitiltil ka na man og maayo sa ilawom sa dagat.”

Wala gihapon motingog si Colleen. Si Cody diay ang nagluwas sa iyang kinabuhi. Sa wala’y duhaduha, hero gayod alang kaniya si Cody. Bisan dili siya’y tag-iya sa kasingkasing niini apan bayani gihapon kini sa iyang kinabuhi. -- Sumpayan pa