Ang kinaunahang gubat

Si Lucifer ang gitawag og Anak sa Kabuntagon (Son of the Morning) niadtong wala pa siya ilabay sa Makagagahom didto sa langit. Sila nga mga anghel, kauban na niini ang Anak sa Kabuntagon, bisan mga espiritu sila, duna silay mga hitsura kun magpakita sila.

Apan kining gitawag og Anak sa Kabuntagon gibuhat sa Dios nga lahi sa tanan. Gikan sa lapalapa sa iyang mga tiil hangtod sa alimpulo sa iyang ulo, gibuhat siyang walay ikasaway. Gibuhat siyang ambongan sa tanang mga ambongan. Gihatag kaniya ang gahom nga labaw pa kay sa mga anghel ug bisan kang Gabriel Arkanghel.

Gibutang siya sa pinakataas nga trono sunod sa Makagagahom nga ang kalainan na lang nilang duha mao nga siya binuhat ug ang Dios ang Magbubuhat. Daghan siyang mga anghel nga kabig, nga bisan unsay iyang mga hukom, mosunod kini kaniya.

Tungod niining tanan, nahimo siyang mapahitas-on, nagmataas siya ug naka-ingon sa iyang kaugalingon: "Wala nay molabaw pa kay kanako. Akong dad-on ang akong trono ug akong itupong sa trono sa Hataas Uyamut."

Iyang gidani ang iyang mga kabig nga mga anghel nga mosukol sila ug mo-rebelde sa Dios. Sa dihang ilang gikauyonan ang pag-rebelde, nahitabo ang kinaunahang gubat didto sa langit. Si Lucifer ug ang iyang mga kabig batok sa panon sa Dios nga gipangulohan ni Gabriel Arkanghel.

Nalupig sila sa mga anghel ni Gabriel Arkanghel, busa gisalibay sila dinhi sa kalibotan. Ang uban didto mapunta sa mga kakahoyan ug kalasangan, ang uban didto mapunta sa kadagatan. Pag-abot sa sibilisasyon, daghan ang ania sa mga lainlaing dapit sa kalibotan.

Apan silang tanan, kun unsa may ilang mga hitsura kun magpakita sila sa tawo, mga kabig sila ni Lucifer. Ang kanhi Anak sa Kabuntagon, nahimo nang yawa ug satanas, siya nga nagalimbong sa tibook kalibotan.

Busa, ang kinaunahang gubat didto mahitabo sa langit. (Katapusan)