Ang sinugdanan anaa sa kataposan

“Diri lang ko,” gisinggit ni Colleen ang iyang tubag ngadto kang Yana.

Wala madugay, namatikdan ni Colleen nga naglagyoay na ang nagpares-pares nga mga babaye ug lalaki nga iyang mga kauban. Sila si Cody ug Alexa nagpalayo sa grupo. Kaha gusto’g privacy ang duha bisan sa publikong lugar -- aron wala’y laing makadungog sa ilang panagsultihan. Nagpalayo sila sa ubang mangaligoay.

Mao usab sila si Katrin ug Rafal. Nagpadistansiya sila gikan sa nahimutangan nilang Cody ug Alexa. Samtang sila si Yana ug Jarren, imbes mangaligo, mipasilong na hinuon sa landong sa usa ka kahoy nga mitubo sa daplin sa dagat ug nagsultihanay. Nagpadayon sa pagkaligo si Colleen sa taga hawak nga giladmon sa dagat. Bugnaw kaayo ang tubig ug gibati niya ang kahilwas sa iyang kaugalingon.

Apan ang kabugnaw sa dagat wala makahupay sa nagsipok niyang hunahuna.

Ang gibantayan ni Colleen mao ra sila si Cody ug Alexa nga “loving” kaayong tan-awon samtang nangaligo. Nasina siya sa duha. Dili lang kay kasina kondili naghingapin nga pangabubho gayod ang iyang gibati.

Maayo pa lang lagi unta kadto’g wala na lang ko mokuyog. Gibasol na usab ni Colleen ang iyang kaugalingon. Kun wala pa siya mokuyog, dili unta siya makasaksi ug makasud-ong sa malipayong mga gutlo sa pagpangaligo sa dagat nila ni Cody ug Alexa. -- Sumpayan pa