Ang loveteam nila ni Jackie ug Jerome hingpit nga natapos sa dihang mibuto ang balita nga may relasyon ang naulahi ngadto kang Charamaine Conde, laing youngstar kinsa gi-loveteam ngadto ni Mark Paras. Wala matago ang relasyon nila ni Jerome ug Charamaine sa dihang mimabdos ang babaye. Ang maong hitabo nakaapekto sa ilang career. Naputol ang loveteam nila ni Jackie ug Jerome. Nawagtang usab sa sirkulasyon sa showbiz ang loveteam nila ni Charamaine ug Mark. Wala na suportahi sa masa ang masig nila ka loveteam tungod kay nasayod na man ang katawhan sa real score tali kanila.
Nakahunahuna ang manager ni Jackie nga i-loveteam siya ngadto kang Mark Paras apan nagdumili siya.
“Dili na ko nianang loveteam-loveteam,” ni Jackie pa. “Gawas pa, gipul-an na ko sa pagpakigplastikay sa mga tawo. Sa pag-angkon sa relasyon nga dili tinuod. Dili ba gayod diay kita maka-exist sa showbiz kun wala’y loveteam?”
“Mao kana ang uso karon sa local movie industry ug sa showbiz in general,” matud ni Joy Lorenzo. “Nakita man bitaw nimo ang kainit sa acceptance sa masa sa mga pelikula ug soap opera ninyo ni Jerome kaniadto. Tungod kadto kay suportado sa masa ang inyong loveteam. Ug lisod kaayo natong usbon ang maong sistema nga ingon sa na-mindset na sa mga tawo. Ang atong mahimo mao na lang ang pagpahiuyon niini.” -- Sumpayan pa