Naghilak nga Bituon

Gula 75

“Hunahunaon ko pa kini’g maayo, Julio,” nagkanayon si Jackie. “Mitagam na ko sa akong pagpakigrelasyon kang Flip Garcia. Nasayod ka na tingali kun unsay nahitabo kanamo, di ba?”

“Oo. Nabasa ko kadto sa mga pamantalaan. Unsa ba gyud diay ang tinuod niadtong tanan?”

“Tinuod nga may relasyon kami ni Flip. Apan gi-deny ko kini atubangan sa taga media tungod kay mao kini ang gustong mahitabo sa akong manager for the sake of my career. Pero sa wala pa kami magkarelasyon, gikondisyonan ko siya nga akong dawaton ang iyang gugma basta mosugot siya nga ililong namo sa publiko ang among relasyon. Misanong siya. Pero wala niya tumana ang among gikasabotan maong nakigbuwag ko niya.”

“Wala lang tingali siya makasabot sa matang sa imong trabaho.”

“Dili na ko buot nga masubli ang nahitabo kanamo ni Flip.”

“Lahi ko ni Flip, Jackie. Kun ako’y imong kondisyonan og sama sa gikondisyon nimo kang Flip, wala’y problema. Andam ko pagtuman tungod ug alang sa imong career. I can assure you nga dili nako buhaton ang sama sa gihimo ni Flip.”

Bisan sa pasalig ni Julio apan nagduhaduha pa gihapon si Jackie. Mao nga nangayo siya’g dugang panahon ni Julio sa pagtimbangtimbang sa proposition niini. Wala mamugos si Julio kaniya. -- Sumpayan pa