Ang sinugdanan anaa sa kataposan

Gula 32

Mitingog ang message alert tone sa cellphone ni Colleen. Iyang gisusi kun kinsay nag-text kaniya. Si Brendan diay. Nangutana si Brendan kun hain sila. Atua diay si Brendan sa ilang gipuy-an ug nahibulong ang ulitawo kay wala man kini naabtan nga tawo didto.

“Out-of-town mi,” gitubag niya ang text ni Brendan. Wala niya tug-ani ang ulitawo nga mikuyog siya nila ni Alexa nga nangaligo og dagat sa Dalaguete.

Mi-text pag-usab si Brendan kaniya apan wala na kini niya nabasa. Giabot sa pagka-off sa iyang cellphone. Lowbat!

Mibatig kalagot si Colleen. Wala siya’y laing kalingawan gawas sa iyang cellphone samtang nag-inusara siya sa cottage. Mag-unsa siya dinhi? Magtamuka samtang magpaabot nga mahuman sa pagpangaligo sila si Alexa?

Tungod sa kamalinawon sa panahon, sa katin-aw sa tubig sa dagat ug sa kaalegre sa mga nangaligo nga iyang nasaksihan, giabot og kaikag si Colleen nga maligo sa dagat. Mao nga naligo na lang usab siya.

Pero wala siya motipon sa grupo nila ni Alexa. Naglain siya. Nagpalayo siya kanila.

“Colleen,” gitawag siya ni Yana dihang nakamatikod kini nga nagpaantaw lang siya kanila. “Dali diri. Tipon diri namo aron mabibo ta.” -- Sumpayan pa