Naghilak nga Bituon

Hapsay kaayo ang dagan sa career nila ni Jackie ug Jerome.

Miabot sa kinabuhi ni Jackie si Cong. Julio Dechavez. Nagkaila sila atol sa usa ka affair nga gipasiugdahan sa dagkong mga haligi sa industriya sa pamelikula sa Pilipinas nga gitambongan ni Jackie.

Si Cong. Dechavez maoy chairman sa amusement and entertainment sa kongreso mao nga kini ang gikuhang guest speaker sa maong kalihokan nga may kalabotan sa pagpalig-on sa film industry sa nasod.

Nakigsuod si Cong. Dechavez kang Jackie. Hangtod nga misangko gayod ang tanan sa pagpangulitawo sa kongresista kaniya. Bisaya usab ang pinulongan sa kongresista tungod kay taga Mindanao kini ug maoy representante sa kongreso sa usa sa mga probinsiya sa nabantog nga yuta sa saad.

“Gikasubo ko, Julio,” balibad ni Jackie. “Pero priority nako karon ang akong career.”

“Dili ba diay mahimo nga mag-artista ug sa samang higayon magbaton usab og hinigugma?” sukit sa batan-ong kongresista.

“Samok ang kalibotan nga akong gipuy-an karon. Puno sa intriga. Seguradong maapektohan ka sa intriga kun makigrelasyon ka nako. Tingalig mabag-ohan ka ug dili makadawat sa matang sa career nga akong gisudlan.” -- Sumpayan pa