Nakasinggit ang mangtas nga wakwak

Daan nang mahiligon sa pagkupot og mga mahait nga butang si Elias bisan pa niadtong nagtungha pa siya sa Elementarya. Kun wala siya’y klase ilabi na kanang ma-Sabado modalikyat gyud si Elias didto sa bungtod.

Kay lagi mingaw man ang bungtod ibabaw sa balangay ug adto siya magpraktis og labaylabay sa punyal nga iyang dala. Ug adto niya kini itumong sa punoan sa dakong kahoy nga anunang. Motagdoy ang duha ka punyal nga iyang ilabay nga dunganon niya.

Matag Sabado o di ba matag Domingo moanhi gyud siya dinhi sa bungtod kay alang kaniya Elias wala’y makasaksi sa iyang pagabuhaton nga mao ang paghanas sa paglabay sa punyal.

Dihay kausa wala siya makamatikod nga may maukitong mga mata nga misaksi sa iyang pag-target sa punoan sa anunang pinaagi sa dala niyang lima ka buok punyal. Pulong mitaroy sa punoan sa anunang ang lima ka punyal nga iyang gisagunson paglabay. Ang mga mata nga nagtutok kaniya mao ang mga mata ni Saling, ang anak dalagita ni Posong–Talya.

Kini si Talya anak ni Ingko Sibiro nga maoy gikahadlokan kaniadto nga mangtas nga mangabat sa may karaang tulay. Apan gipatay siya sa usa ka sundalo dihang mao kini iyang gibugno. Sukad niadto wala nay mangabat sa karaang tulay.

“Hawra nimo mo-target, uy, Elias,” ni Saling pa nga mipaduol sa nahimutangan ni Elias.

“A, taghap lang ni, uy, Saling” kalmang tubag ni Elias. Kini si Saling manghod lang og usa ka tuig ni Elias. Grade six si Elias ug Grade five si Saling. Guwahon usab kini si Saling. Pero namatikdan ni Elias nga mora’g mosuod kini kaniya. Iya na lang pud nga gisuod si Saling.

Ang balay nila ni Saling tua mahimutang sa may karaang atabay duol sa karaang dakit. Ug kay nadungog man si Talya nga maoy gibinlan sa iyang amahan nga si Ingko Sibiro maong gilikayan usab hasta si Saling sa mga katalirongan niyang mga bata dinhi sa ilang balangay sa Punta. Si Elias lang ang matawag nga suod nga higala ni Saling.

Ug dihang hayiskul na sila misamot kahanas ni Elias paglabay sa punyal. Usa kini ka tinagoan nga si Saling ray nahibawo. Dihay kausa nga dunay usa ka langgam nga nagbatog sa sanga sa kahoy’ng bagalnga ug dihang milupad kini giapas kini’g labay ni Elias sa iyang punyal ug maayo kaayong pagkaigo ug natagak nga nalapsan sa punyal.

Unya usa ka gabii nagubot ang mga lumolupyo dihang mitumaw pagkalit ang usa ka mangtas nga wakwak. Daghan nang gipangbalbal niini. Ang kakuyaw niini kay mosaka gyud sa balay ug paborito niini ang mga mabdos nga asawa. Milabay ang pipila ka buwan ug mao lang gihapon misamot kabangis ang wakwak. Mabdos ang inahan ni Elias sa kinamanghoran niyang igsoon. Ug dinhi usab wala lang damha nga nagkahigugmaay sila si Elias ug Saling.

“Ayaw baya og kompiyansa, ha, “Elias,” ni Saling pa. “Basin og atngan ka sa mangtas nga wakwak diha sa dalan. Lawom na ra bang gabii...”

“Aw, manalipod pud ko sa akong kaugalingon. Nia man ko’y dalang punyal,” hinay’ng tubag ni Elias dihang namisita siya sa dalaga usa ka gabii niana.

Unya, nasigpatan ni Elias ang inahan ni Saling nga si Talya nga nanaog sa silong. Unya, pagkataudtaod, may nabati si Elias nga tingog sa wakwak. Dinhi nananghid na lang si Elias nga mopauli na siya.

Sa diha na siya duol sa dakit mitingog ang wakwak didto sa itaas nga nagpatungod paglupad kaniya ug kay hayag ang buwan nakita kini ni Elias. Dihadiha giibot niya ang usa ka punyal nga may boronse sa tumoy niini gikan sa iyang hawak ug hinurot ang kusog nga gi-target niya kini.

Ug nabati ni Elias ang pagtig-ik sa wakwak nga nagkanayon, “Ayaaaayyy!” ug nakita ni Elias nga misarap kini paingon sa balay nilang Saling. Pagkaugma, nadungog nga patay na si Talya, ang inahan ni Saling. Unya nianang pagka hapon naghilak nga miduol si Saling kang Elias nga nagkanayon, ‘Elias, patay na si nanay Talya nako ug luoy kaayo kay nalapsan ang iyang dughan sa usa ka punyal, hu, hu, hu, hu...” ug mibakho kini.

Mora’g nakonsensiya si Elias apan mangtas nga wakwak ang iyang gilabay sa iyang punyal kagabii. Karon nagtuo na gyud siya nga si nang Talya mao ang mangtas nga Wakwak. (Katapusan)