Ang sinugdanan anaa sa kataposan

Gula 29

Ang nagdrayib sa multicab mao ang ig-agaw ni Rafal. Si Colleen unta ang palingkoron sa front seat tupad sa driver apan mibalibad siya. Mao nga si Yana ang milingkod didto sa front seat.

Sila si Cody ug Alexa nagtupad sa pagpanglingkod sa luyong lingkoranan habig sa tuo sa multicab. Sila si Rafal ug Katrin nagtupad usab sa atbang nga lingkoranan. Si Colleen naglain paglingkod sa daplin sa pultahan sa sakyanan.

Samtang nagdagan ang sakyanan, nagsultihanay ang managhigugmaay. Apan si Colleen naghilom lang. Wala siya’y ikasulti-sulti tungod kay si Yana atua man molingkod sa front seat tupad sa driver.

“Apil sab diri sa among gipanagsultihan, Colleen,” agda ni Katrin nga nakaila na kaniya. “Mora ka man gud intawon diha’g gidaug-daug ug wala’y kaila.”

“Sagdi lang,” ni Colleen pa. “Okey ra ko diri.”

Nagpadayon pagdagan ang multicab nga ilang gisakyan. Ang managhigugmaay naghagwaay sulod sa sakyanan. Sila si Cody ug Alexa nagkinusnitay.

Milingiw si Colleen. Dili siya buot nga makasaksi sa kamalipayon sa duha. Sakitan siyang magsud-ong kanila nga malipayon. Dili gyud niya kalikayan nga mobati og pangabubho. -- Sumpayan pa