Pinoy sa America

Mahinamon si Daisy nga naglingkod sa arrival area sa hugpaanan sa Mactan. Gihulat niya iyang pamanhunon nga naka-chat niya sa Internet balig duha ka tuig na karon. Nagsige siya'g tan-aw sa iyang relo de pulso. Minus kinse na lang para alas diyes sa buntag. Alas diyes ang iabot ni George gikan sa Amerika, sumala sa schedule nga gi-televized sa mga piniling lugar sa hugpaanan.

Gisul-ob ni Daisy ang iyang pinakanindot ug pinakabongga nga gown. Daghang makalingi niya nga mga lalaki. Ma-batan-on o tiguwang nga lalaki, bation gyud og kaibog niya. Kay bisag singkuwenta na iyang edad, lima ka tuig nang biyuda, mora gihapo’g dalaga tan-awon.

Kay wa magay-ot iyang lawas sa pagpanganak. Wa man sila ka anak sa iyang bana. Si Frank biyudo og may tulo ka anak sa unang asawa nga mga propesyonal na. Usa ka CPA si Frank nga namatay sa komplikasyon sa dayabitis sa pag-edad og 65. Gidasig si Daisy sa mga anak sa iyang bana nga magminyo pag-usab. Busa, nangita siya'g Pinoy sa America, pinaagi sa Internet.

Sulod sa unom ka buwan nga nagsigi’g chat sila si Daisy ug George sa Internet, nagkauyab sila. Diborsiyado si George. Iyang asawa Amerkana ug dili gyud magkatakdo sa Pinoy nga kinaiya. Busa wa nagdugay, nagkabulag sila. Ang usa ka anak nila nga babaye tua kuyog sa inahan. Nakahukom siya nga Pinay nalang iyang pangasaw-on.

Sumala sa ilang mga binayloay og mensahe sa Internet, si George nagtrabaho sa usa ka restawran nga naa sa usa ka Five Star Hotel sa Kansas. Waiter siya sa Adobe Walls Restobar. Daghang siyang natigum nga tips nga gisulod niya sa attachè case. Ang attaché case gisulod niya sa safety deposit box sa Kansas Commercial Bank. Matud pa ni George, iya nang dalhon sa Pilipinas kuwartaha kun magminyo na sila. Anhi sila pakasal sa Pilipinas.

Nakagusto si Daisy sa hitsura ni George. Guwapa siya. Agid-agid ni Rudy Fernandez nga artista. Nagka-eye-ball naman sila kadaghan sa Internet. Ang hitsura ni Daisy nakita na sab ni George sa Internet. Ug nagdayigay sila nga mga guwapo ug guwapa sila. Parison gyud kono sila.

Dihang gusto nang mouli sa Pilipinas si George ug nangayo og pabor ni Daisy.

"Nagkinahanglan ko’g US$100,000 aron makuha nako akong kuwarta nga gisulod sa attachè case nga tua sa safety deposit box sa banko. Puwede lang nako lilion ang kuwarta og kuhaan ug litrato. Pero dili nako matandog o madala. Kay nakautang ko sa banko. Sila ang naggunit sa yawe sa safety deposit box," matud ni George isa iyang mensahe sa Internet mga tulo na ka bulan ang nakalabay.

Nakita ni Daisy sa screen sa iyang computer ang attachè case nga giukab ug namungingi sa berdeng salapi. Giihap kuno sa taga-banko ug nikabat og dos milyones dolyares.

"Ako ning paisyuhan og manager's check payabale to Daisy Apurimac. Mao ni una nakong itunol nimo inig abot nako sa airport," ni George. Ug nilupa ang atay ni Daisy.

Wa gyud papugong si Daisy sa iyang mga igsoon, ig-agaw ug mga paryente nga giilad lang siya ni George. Magtutudlo siya sa Royal Charms Child Development Center. Nasayud sab iyang mga higala sa kahimtang nila ni George. Ug nisupak sila nga magpadala og kuwarta si Daisy ngadtong George. Nila pa, bisag unsa ka dugay ninyong higala o uyab sa Internet, kun mangayo gani’g kuwarta ang uyab, ilad gyud na. Bisag, negosyo, kun mangayo gani daan og kuwarta ang pikas linya, ilad gyud na.

Apan gibutaan si Daisy sa iyang gugma ni George. Giprinda niya iyang house and lot, mga alahas ug sakyanan nga kabilin ni Frank. Lima ka milyones pesos ang giabut. Ug iyang gipa-convert ngadto’s manager's check nga dolyar ug gipadala sa address ni George. Puwerteng lipaya ni George. Nisaad nga mouli na's Pilipinas.

Nikisaw na ang arrival area. Niandar ang conveyor nga nagpagawas sa mga kargang bag, kinarton o mga malita nga gi-check-in. Niabot na ang ayroplanong gisakyan ni George. Daghan nang nagpalibot sa conveyor nga nanguha sa ilang mga karga. Ug may niduol ni Daisy nga balikbayan:

"Are you Miss Apurimac?" sa tawo. "George described you to me accurately" dugang sa tawo.

"Yes, sir. I am. Where is he?" ni Daisy. Nikuba ang dughan. Nitindog nga mapahiyomon.

"He has a letter for you" sa tawo nga nagtunol og sobre. Gidawat dayon ni Daisy.

"Thank you" niya pa. Ug nipadayon sa gawas ang tawo bitbit iyang dakong maleta.

"Pasayloa ko nga dili mahinayon atong kasal. Naarestar ko sa airport kay nakadala ko'g luggage nga may drugas nga illegal. "Nabasa ni Daisy ang pasiunang mga linya sa sulat. Ug nilingkod siya'g balik kay ningitngit iyang panan-aw. (Katapusan)